4,5 mln teńgeden astam somaǵa jol erejesin buzǵan almatylyq óz qateligin qaıtalamaýǵa keńes berdi.
Reseı Federasıasynda tirkelgen Toyota Camry kóliginiń 38 jastaǵy ıesi avtokólik júrgizýshileriniń antıreıtınginde kósh bastady. Ol jalpy somasy 4 mln 574 myń 700 teńgege jol qozǵalysy erejesin buzǵan, dep habarlaıdy Almaty-akshamy.kz Polisia.kz-ke silteme jasap.
Odan keıin 1 mln 362 myń 750 teńge kóleminde tólenbegen aıyppuly bar BMW kóliginiń ıesi tur. Nebári úsh kúnde Almaty joldarynda júrgizýshileri JQE óreskel buzyp, aıyppul tólemeıtin 33 kólik ustaldy.
«Men reseılik nómirmen reseılik tirkeýdegi kóliktiń ıesimin. Birneshe jyl aıdadym, erejeni buzdym. Aıyppul sommasy shamamen 4,5 mln teńgeni qurady. Meni polısıa qyzmetkerleri ustady, kólikti aıyppul turaǵyna qoıdy. Amal joq, aıyppul tóleýge týra keldi. Olardy tólegen soń, men qatty kúızeliske tústim: keıde tipti dári-dármekpen ózimdi tynyshtandyrdym. Bolashaqta muny qaıtalamaımyn. Tóleý óte aýyr boldy. Bári úshin tóleý kerek bolady, sondyqtan JQE buzbaǵanyńyz jón. Almatylyqtardy, respýblıka turǵyndaryn JQE saqtaýǵa shaqyramyn», – dedi quqyq buzýshy.
Osy jáne basqa da jol qozǵalysy erejelerin qasaqana buzýshylardy polısıa avtomattandyrylǵan aqparattyq júıeler arqyly anyqtap jatyr.
«Buǵan deıin birneshe ret habarlanǵandaı, Almatyda jalǵan memlekettik tirkeýish nómirlik belgilerin paıdalanatyn, kólikterge arnaıy belgi beretin qurylǵylar ornatqan kólik júrgizýshilerin, kólikti mas kúıinde basqarǵan jáne tólenbegen aıyppuldary bar adamdardy anyqtaý jáne jaýapkershilikke tartý boıynsha maqsatty jumystar júrgizilip jatyr. Ákimshilik aıyppuldardy ýaqtyly tóleý qajettigin taǵy da eske salamyz jáne jol qozǵalysy erejelerin qatań saqtaýǵa shaqyramyz», – dedi Almaty qalalyq PD ákimshilik polısıa basqarmasynyń bastyǵy Asqat Qulbaev.