Qazaqtyń kıiz úıin unatqan eýropalyqtar endi ulttyq dám qazyǵa erekshe qumar. Tipti, jylqynyń etin ómiri jep kórmegen qart qurlyq turǵyndary qazir qazy dese eleń etetin bolǵan.
Sheteldikterdiń jáne Eýropadaǵy qandastarymyzdyń suranysyn ótep júrgen jerlesimiz Belgıada qazy jasap, saýdaǵa shyǵarady, dep habarlaıdy Almaty-akshamy.kz qazaqstan.tv-ge silteme jasap.
Almatylyq Saǵynǵalıdiń Belgıada turyp jatqanyna bıyl bes jyl. Brússeldegi joǵarǵy tehnologıa mektebinde bilim alǵan jerlesimiz, oqýdan soń, osynda jumysqa qabyldanypty. Toqyma ónerkásibi salasynda bilikti maman. Eki jyldan beri qazy jasaýdyń has sheberi atanǵan. Jalǵyz ózi qart qurlyqtaǵy aǵaıyndy qazaqtyń ulttyq taǵamymen qamtamasyz etip otyr.
Shetelge kelgende ulttyq taǵamdardy ańsap, etti, qazyny saǵyna bastaısyń. Sosyn, elden alyp keletin adam izdep, ony zaryǵa kútesiń. Osylaı, birneshe jyl qınalyp júrip, bir kúni qazyny ózim jasap kórýge bel býdym. Bul jerde jylqynyń eti tapshy. Sol etti, ishekterdi, barlyq ıngredıentterin tabý úshin jarty jyl ýaqyt ketti. Ózime istep kórip edim, onan soń, dostarym, dostarymnyń dostary, ári qaraı, adamdar bir-birinen estip, qazyǵa tapsyrys kóbeıdi.Saǵynǵalı Mamaı, kásipker
Qalanyń balasy qazy aınaldyrýdy ǵalamtordan úırenipti. Jińishke ishekke etti tez tyǵý úshin plasıkten myna quraldy jasap alǵan. Tutynýshynyń talǵamyna saı, ózbekterge ánis ósimdigin qosyp, eýropalyqtarǵa qazynyń maıyn azdaý qylyp aınaldyrady. Bárinen de Saǵynǵalıǵa jat jerdegi óz qandastarymyz rıza.
Qonaq shaqyratyn bolsaq, et asatyn bolsaq, eń birinshi habarlasatyn kisimiz osy Saǵynǵalı. Birden ákelip beredi. Óte dámdi qazysy, shyny kerek. Anda-sanda saǵynyshty basamyz dep alyp turamyz. Barlyq quramy, dámi Qazaqstanda jasalynatyn qazy sıaqty.Aınur Ońtalapqyzy, Belgıadaǵy qazaq dıasporasynyń ókili
Jekelegen adamdardan bólek Saǵynǵalı qazir Eýropa qazaqtarynyń toı-dýmandaryna iri kólemde tapsyrys alyp júr. Qazynyń baǵasy salmaǵyna baılanysty, 15 eýromen 25 eýro aralyǵynda. Qazaqtardy qýantyp, sheteldikterge ulttyq taǵamdy dáriptep júrgen Saǵynǵalıdiń endigi kózdegeni-Belgıada qazy jasaıtyn seh ashyp, daıyn ónimdi jergilikti dúkenderge satylymǵa shyǵarý.