Almatyda Qazaqstan Respýblıkasy Sý sporty túrleri federasıasynyń konferensıasy ótip, qazaqstandyq Olımpıada chempıony Dmıtrıı Balandın jaýapty qyzmetke taǵaıyndaldy, dep habarlaıdy almaty-akshamy.kz.
Atalǵan federasıa baspasóz qyzmeti málim etkendeı, uıymnyń prezıdenti men atqarýshy komıteti qaıta saılandy.
2016 jylǵy Brazılıada ótken Olımpıada oıyndarynyń jeńimpazy Dmıtrıı Balandın federasıanyń vıse-prezıdenti qyzmetine taǵaıyndaldy.
«Maǵan senim artqandaryńyzǵa alǵys aıta otyryp, elimizdegi jáne halyqaralyq arenadaǵy sý sporty túrleriniń damýyna óz úlesimdi qosatynym úshin qýanyshtymyn. 2023 jyly ótken Azıa oıyndarynda bizdiń federasıa sportshylarynyń 80 paıyzy oıyn tuǵyryna kóterildi. Bul federasıa jumysynyń tıimdiligin dáleldeıdi. 2016 jyly jeńip alǵan Olımpıadanyń altyn medali maǵan úlken eńbektiń nátıjesinde keldi. Búginde men ózimniń tájirıbem men jigerimdi Qazaqstandaǵy sý sporty túrlerin damytyp, qoldaýǵa daıynmyn», - dedi Qazaqstan Respýblıkasy sý sporty túrleri federasıasynyń jańa vıse-prezıdenti Dmıtrıı Balandın.
Aıta ketelik, Balandın Rıo Olımpıadasynan bólek, 2014 jyly ótken Inchhondaǵy jazǵy Azıa oıyndarynda úsh márte jeńimpaz atanǵan. Qazirgi tańda ol sporttaǵy mansabyn aıaqtap, jaýapty qyzmetke kiristi.
Esterińizge sala keteıik, osyǵan deıin bokstan 2013 jylǵy álem chempıony, Olımpıada oıyndarynyń qatysýshysy Birjan Jaqypov «Shymkent kásipqoı boks túrleri klýby» komýnaldyq memlekettik mekemesiniń dırektory laýazymyna taǵaıyndalǵanyn jazǵan bolatynbyz.