Memleket basshysy Astana qalasyndaǵy №96 mektep-gımnazıany aralap kórdi. Prezıdentke bilim oshaǵyndaǵy oqý-tárbıe jumystarynyń barysy tanystyryldy, dep habarlaıdy almaty-akshamy.kz.
Bul mektep jemqorlardan tárkilengen qarjyǵa salyndy. Bıyl paıdalanýǵa berilgen gımnazıa elordanyń sol jaǵalaýyndaǵy basqa mektepterdiń júktemesin azaıtýǵa septigin tıgizdi. Qazir munda 1466 oqýshy bilim alady.
Qasym-Jomart Toqaevqa qoǵamdyq-gýmanıtarlyq baǵytta bilim beretin mektep-gımnazıanyń oqý úderisi týraly baıandaldy. Oqýshylarǵa aǵylshyn, fransýz tilderimen qatar, qytaı tili de oqytylady.
Mektep dırektory Sáýle Temenovanyń aıtýynsha, munda ınklúzıvti bilim berýge basa nazar aýdarylǵan. Bul rette ár oqýshyǵa jeke oqý baǵdarlamasy ázirlengen. Sondaı-aq ınklúzıvti qoldaý, emdik dene shynyqtyrý jáne beıinaldy daıarlaý kabınetteri bar. Búginde mektep-gımnazıada arnaýly bilim berýdi qajet etetin 28 bala oqıdy. Sonymen qatar mektepte sırk, qysh óneri, balet úıirmeleri jumys isteıdi.
Memleket basshysy mektep-gımnazıanyń sport zalyn, robotty tehnıka kabınetin aralap kórip, oqýshylarmen áńgimelesti.
«Robotty tehnıka – perspektıvti sala. Men sizderdi qoldaımyn. Qazir álem jasandy ıntellektige basa mán berip otyr. Onyń ishinde Qazaqstan da bar. Bul – óte mańyzdy baǵyt. Jasandy ıntellekt keleshekte árbir salada paıdalanylady. Sondyqtan Qazaqstan osy iste ozyq el bolýy kerek dep oılaımyn», – dedi Qasym-Jomart Toqaev.
Sonymen qatar Prezıdent №96 mektep-gımnazıanyń pedagogıkalyq ujymymen júzdesip, memleket ustazdardyń mártebesin odan ári kóterýdi jalǵastyra beretinin aıtty.
Budan bólek, Memleket basshysyna elordanyń bilim berý júıesi jaıynda baıandaldy. Astana qalalyq Bilim basqarmasynyń basshysy Qasymhan Senǵazyev bıyl 16 myń oqýshyǵa arnalǵan 12 mektepti paıdalanýǵa berý josparlanyp otyrǵanyn jetkizdi. Búginge deıin 7 mektep ashylǵan. Jyl sońyna deıin taǵy 5 jańa mektep iske qosylmaq.
Sonymen qatar basqarma basshysy Prezıdenttiń Astana qalasynda pedagogıkalyq joǵary oqý ornyn ashý jónindegi tapsyrmasy boıynsha atqarylyp jatqan jumystarǵa toqtaldy.