QR Qorǵanys mınıstrliginiń áskerı klınıkalyq gospıtali men Almaty jolaýshylar kóligi jáne tehnologıalar koleji ózara yntymaqtastyq jáne «Jas dáriger» áskerı-patrıottyq klýbyn qurý týraly memorandýmǵa qol qoıdy.
Sharttyń negizgi maqsaty – jastardyń bastamalaryna qoldaý kórsetý, birlesken jobalardy iske asyrý, sondaı-aq óskeleń urpaqty áskerı-patrıottyq is-sharalarǵa keńinen tartý, dep habarlaıdy almaty-akshamy.kz.
QR Qorǵanys mınıstrligi áskerı klınıkalyq gospıtaliniń bastyǵy medısına qyzmetiniń podpolkovnıgi Asqar Rysbaev áskerı-patrıottyq klýbtar jastardyń bos ýaqytyn uıymdastyrý úshin mańyzdy áleýmettik-pedagogıkalyq negiz bolyp tabylatynyn atap ótti.
– Klýbqa on bes stýdent qosyldy. Biz olarǵa alǵashqy medısınalyq kómek kórsetý daǵdylaryn úıretemiz. Bul bilim olardyń ómirinde paıdaly bolýy múmkin, – dedi ol.
Kezdesý barysynda jastarǵa áskerı-patrıottyq tárbıe berýdi damytý boıynsha birlesken is-qımyl jospary bekitildi. Olardyń qatarynda kezdesýler, sporttyq is-sharalar, túrli konferensıalar, semınarlar men konkýrstar ótkizý bar.
Búgingi tańda QR Qarýly kúshteriniń Bas áskerı-medısınalyq basqarmasy Almaty, Taldyqorǵan jáne Taraz qalalaryndaǵy orta oqý oryndarynyń bazasynda úsh «Jas dáriger» áskerı-patrıottyq klýbyn ashty. Onda áskerı dárigerler oqýshylarǵa áskerı-medısınalyq daıarlyq negizderin úıretedi.
