Álemde talaı qyzyq bar!
72 jastaǵy Muhammed Azız álemde sýretke eń kóp ret túsirilgen kitap satýshy. Kúni boıy kitaptan bas almaıtyn erekshe kitap satýshy Marokkonyń Rabat qalasynda turady, dep habarlaıdy Almaty-akshamy.kz.
Halyqtyń 26% - y áli hat tanymaıtyn elde kitap satý isi - bul óz qalasy men ádebıetine degen súıispenshilikten bolsa kerek.
6 jasynan bastap jetim qalǵan Azızdiń ómiri qıyndyqqa toly bolǵany sondaı, ol orta mektepti aıaqtaı almaǵan. Óıtkeni onyń oqýlyq satyp alatyn jaǵdaıy bolmaǵan. 1963 jyly 15 jasynda ol alǵash ret kitap satýshy retindegi isin 9 kitaptan bastaǵan. Aǵash astynda otyryp, kilemge jaıyp sata bastaǵan Muhammed Azızdyń dúkeninde búginde myńdaǵan kitap bar.
Bir qyzyǵy, onyń búkil ómiri sol kitaptarynyń arasynda ótip jatyr. Ol ýaqytynyń basym bóligin, ıaǵnı kúnine 6-dan 8 saǵatqa deıin kitap oqýǵa jumsaıdy jáne tek tamaqtanýǵa, duǵa etýge, temeki shegýge jáne klıentterge kómektesý úshin úzilis jasaıdy eken. Qalǵan ýaqytta ol keıinirek óz dúkeninde satylatyn kitaptardy izdeý úshin aýdandardy aralaıdy.
Bul áreketin kitapqumar adam óziniń balalyq shaǵy pen kedeılikten alǵan óshi dep sanaıdy.
"Men arab, fransýz, aǵylshyn nemese ıspan tilderinde 4000-nan astam kitap oqydym, ıaǵnı 4000-nan astam ómir súrdim deýge bolady. Árkimniń osyndaı múmkindigi bolýy kerek! Meniń kúnimniń oıdaǵydaı ótýi úshin maǵan tek eki jastyq pen kitap bolsa jetkilikti", - deıdi Muhammed Azız.