"Zań jáne tártip" qaǵıdatynyń qoǵamda tereńdeı ornyǵýy, ásirese keleshek urpaqtyń ómirsaltyna aınalýy "Ádiletti Qazaqstannyń" shynaıy kelbetin túzedi. Sondyqtan da bıyl 1 maýsym – Halyqaralyq balalardy qorǵaý kúni qarsańynda balalar quqyǵy máselesine basa nazar aýdarylyp otyr, - dep habarlaıdy aqshamnews.kz.
Búgin Almatydaǵy №130 gımnazıada balalardyń quqyqtyq mádenıetin arttyrýǵa baǵyttalǵan is-shara da osy maqsatty kózdegen bolatyn. Atalǵan bilim berý mekemesinde ıývenaldy polısıa ókilderiniń qatysýymen "Quqyqtyq tártip" atty aǵartýshylyq is-shara uıymdastyryldy. Balalardyń quqyqtyq saýattylyǵyn arttyrýdy maqsat etken bul kezdesý mektep oqýshylary, muǵalimder úshin paıdaly ári maǵynaly jıyn boldy.
İs-shara barysynda ıývenaldy polısıa ınspektorlary oqýshylarmen ashyq suhbat quryp, balalardyń suraqtaryna naqty jaýaptar berdi. Sonymen qatar balalarǵa qoǵamdyq tártip erejeleri, quqyqtyq normalar jáne jaýapty minez-qulyq negizderi túsindirildi. Kámeletke tolmaǵandar arasyndaǵy quqyq buzýshylyqtyń aldyn alý joldary qarastyrylyp, naqty jaǵdaılardy mysalǵa ala otyryp quqyqtyq keńes berildi.
"1 maýsym – Halyqaralyq balalardy qorǵaý kúni ekeni barshamyzǵa belgili. Bul – jazdyń alǵashqy kúnderindegi erekshe meıramdardyń biri. Osyǵan oraı, 21 mamyrdan bastap qalamyzda keń aýqymdy is-sharalar ótkizilip jatyr. Búgin – sol sharalardyń úshinshi kúni. Bul kún "Quqyqtyq tártip" kúni dep atalady. Ótkizilip jatqan barlyq is-sharalardyń basty maqsaty – árbir bala ózine qaýipsiz, tyńdalǵan jáne mańyzdy sezinetin orta qalyptastyrý. Al búgingi kúnniń "quqyqtyq tártip" taqyrybyn tańdaýy da tegin emes. Bul qoǵamǵa balalardyń quqyqtaryn qorǵaýda polısıa qyzmetiniń mańyzdy rólin eske salý. Búgin biz Almaty qalalyq polısıa departamentimen birlese otyryp, mektep oqýshylaryna arnalǵan aǵartýshylyq shara ótkizip jatyrmyz. Bul – quqyqtyq mádenıetti qalyptastyrý jolyndaǵy mańyzdy qadam", - dedi №130 gımnazıa dırektory Álıa Qasqyrbaeva.
"Jańa oqý jyly bastalǵaly beri biz túrli profılaktıkalyq is-sharalar ótkizip kelemiz. Mysaly, "Qaýipsiz jol", "Túngi qaladaǵy balalar", "Kanıkýl" jáne "Jasóspirim" atty taqyryptyq sharalar turaqty túrde uıymdastyrylady. Sonymen qatar, ıývenaldy polısıa qyzmetkerleri kúndelikti mektepterde oqýshylarmen aldyn alý baǵytyndaǵy áńgimeler ótkizedi. Qazirgi tańda elimizde respýblıkalyq deńgeıdegi jedel-profılaktıkalyq is-sharalar ótip jatyr. Onyń basty maqsaty – balalardyń quqyqtaryn qorǵaý, olardyń arasynda quqyqbuzýshylyqtyń aldyn alý jáne quqyqtyq saýattylyqty arttyrý. Zańdy bilý – ózińdi qorǵaý. Al quqyqtyq tártip – ádiletti qoǵamnyń negizi", - dedi ýchaskelik ınspektor, ıývenaldy polısıa qyzmetkeri Aıgerim Maqsatqyzy.