Ol úshin bı – jaı ǵana óner emes, ómirdiń ózi. Jarty ǵasyrǵa jýyq ǵumyryn ónerge arnaǵan naǵyz talant ıesi. Kim deısiz ǵoı? Shymyldyqtyń artynda shıraq qımylmen bılep, búldirshinderge bı úıretip turǵan qarıany jeliden kórgen bolarsyz. Bul – 76 jastaǵy horeograf Ersin Júsipov. Aqshamnews.kz tilshisi ómirin ónerge arnaǵan atamen suhbattasyp, tutas urpaqtyń shabytyn oıatqan jannyń áńgimesin tyńdady.
Ersin Júsipov - Qostanaı oblysy, Amankeldi aýdany, Baıǵabyl aýylynda dúnıege kelgen. Qostanaı pedagogıkalyq ınstıtýtynda hımıa-bıologıa páni boıynsha bilim alyp, aýyl mektebinde muǵalim bolyp eńbek etti. Alǵashqy kásibı qadamyn veterınar mamandyǵymen bastaǵanymen, ónerge degen mahabbat ony sahnaǵa súıredi. Ustazdyq qyzmetinen bos ýaqytynda balalarǵa bı úıretip júrip, Sol kezdegi qoǵamdyq jumystar onyń taǵdyryn túbegeıli ózgertip jiberdi.
Veterınardan – horeografqa deıingi jol
Ersin myrza, mansabyn ǵylymnan bastap, ónerge degen súıispenshilik qaıta shyǵarmashylyqqa jeteledi. Barlyǵy qalaı bastalǵanyn bylaısha áńgimelep berdi ol:
"Qostanaıdaǵy pedagogıkalyq ınstıtýtqa túsip, sabaq bere júrip, balalarǵa bı úıretýdi de qatar alyp júrdim. Sol kezdiń ózinde-aq mektep basshylyǵy baıqap, meni tárbıe isi jónindegi meńgerýshi etip qoıdy. Sóıtip júrip, aýdandyq mádenıet úıine shaqyrtylyp, óner salasyna bet burdym. 1996 jyly Arqalyq qalasyna qonys aýdaryp, №6 mektepte jáne qalalyq mádenıet saraıynda bir jola bıden sabaq berýge kóshtim" deıdi Ersin ata.
Ersin Júsipov mádenıet saraıynda "Aqbota" bı ansamblin ashyp, 2004 jyly oǵan «halyqtyq» ataq ápergen.
Ózbekáli Jánibekov aıtqan bir aýyz sóz...
1971 jyly Ersin Júsipov 25 jasynda Torǵaı oblysyna bı baıqaýyna 16 oqýshyny aparady. Sol jerde bolashaq qazaq mádenıetiniń uly tulǵasy – Ózbekáli Jánibekovtiń nazaryna iligedi.
"Ózbekáli Jánibekov meni shaqyryp alyp: «Torǵaı jigitteriniń bıin daıyndańyz, taza qazaqy stılde» dedi. Bul – men úshin úlken senim boldy. Sol sózi áli kúnge deıin jadymda jańǵyryp tur", – deıdi Ersin ata.
Osy oqıǵadan keıin Ersin Júsipovke "raıkom" tarapynan buıryq túsip, ol aýdandyq mádenıet úıine ádisker bolyp qabyldanady. Qazir ol Astananyń irgesindegi Qoıandy aýylynda turady. Osy eldi mekende «Mıras» bı ansamblin qurdy. Bir jarym jyldyń ishinde 10-nan astam baıqaýǵa qatysyp, únemi qanjyǵasy bos qaıtqan emes.
"Men juldyz emespin – mindetimdi atqaryp júrmin"
Zeınetke shyqsa da súıikti isimen aınalysýyn qoımaǵan Ersin ata shıraq qımyldaýynyń qupıasyn bólisti. Onyń sózinshe densaýlyqty jaqsy saqtaý úshin qıyn formýla qajet emes.
"76 jasyńda bıden sabaq berý ońaı emes. Degenmen densaýlyqtyń arqasynda istep júrmin. Densaýlyqty jaqsy saqtaý úshin pálendeı qyr syry joq shyǵar. Árkim ózine senimdi bolý kerek. Kún rejimin saqtap, ádettengenmin. Bı de sporttyń bir túri sekildi ǵoı. Osyndaı ózińe unaıtyn, ózińe paıdasy bar ispen aınalysý jáne januıańdaǵy jaqsy jaǵdaı, tynyshtyq, syılastyq densaýlyqqa tek paıda tıgizeri sózsiz" deıdi ol.
Sondaı-aq, Ersin ata áleýmettik jelide taraǵan beıne jaıly:
"Jelide taraǵan vıdeomdy kórip ózim de tańǵaldym. Vıdeony kim túsirgenin bilmeımin. Nemerem «Ata, juldyz bolyp ketipsiz ǵoı» deıdi. Uıalyp ta qaldym. Men juldyz emespin, tek mindetimdi atqaryp júrmin ǵoı" dep áńgimeledi.
Mırasym-muram: "Jas býynǵa jol ashsam deımin"
Qazir Ersin ata balalarmen ǵana emes, bolashaqpen jumys istep júr. Josparlarynyń ishinde Qoıandyda jańa mádenıet úıiniń ashylýy, ájeler men atalardan quralǵan "Qazyna" bı ansamblin qurý, ulttyq salt-dástúrge negizdelgen sújettik bıler qoıylymy bar.
— Jas maman kelse, qýana-qýana ornymdy bosatam. Biraz ýaqyt qoldaý kórsetip, "Mırasymdy" soǵan tapsyryp ketkim keledi. Óner jalǵasýy kerek. Ol meniń ǵana emes, aýyldyń da rýhanı murasy, – deıdi Ersin ata úmitpen.
