Balalardy emdeý – erekshe mısıa. Balalar dárigeri mamandyǵy úlken adaldyqty, izdenisti jáne asa jaýapkershilikti talap etedi. Jańadan dúnıege kelgen sábı aýyryp turǵan jerin aıta almaıdy, osy jaǵdaıda aýrýdyń jazylýyna kómektesetin balalar dárigeriniń róli erekshe mańyzdy. Almaty qalasyndaǵy №2 qalalyq balalar klınıkalyq aýrýhanasynyń pedıatr-dárigeri Irada Kúrdaeva osyndaı bilikti mamandardyń biri.
Nelikten Irada Kúrdaeva pedıatrıany tańdady?
Irada Kúrdaeva medısına ýnıversıtetinde birinshi kýrstan bastap pedıatr bolǵysy kelgen.
"Men balalardy qatty jaqsy kóremin. Eń áserli sátter – balalar alǵysy. Qabyldaýdan keıin qushaqtap, alǵys bildiredi. Dúnıede budan artyq baqyt bar ma? Eń bastysy, balalardyń ata-analary biz jazyp bergen emderdi oryndasa, biz bala densaýlyǵynyń jaqsarǵanyn baıqaımyz," – deıdi Irada Batalqyzy.
Irada Kúrdaevanyń medısına salasyndaǵy joly
Irada Batalqyzy salystyrmaly túrde jas maman. Ol 2008-2013 jyldary Qazaqstan-Reseı medısınalyq ýnıversıtetinde oqydy (medısına bakalavry dıplomy). 2013-2015 jyldary jalpy praktıka dárigeri mamandyǵyn oqyp, 2017 jyly pedıatrıa boıynsha rezıdentýrany támamdady. Jumys ótili 8 jyl bolsa da, Irada ózin kásibı daǵdylary men bilimi bar, óz jumysynda belgili jetistikterge jetken saýatty jáne perspektıvaly maman retinde kórsetti.
Irada Batalqyzy kelesi mindetterdi atqarady:
- Pasıentterdiń profılaktıkasyn, dıagnostıkasyn, emdelýin jáne ońaltýyn júzege asyrý.
- Bilikti, jedel járdem jáne basqa da medısınalyq kómek túrlerin kórsetý.
- Naýqasty tekserý josparyn ázirleý jáne júrgizý taktıkasyn anyqtaý.
- Klınıkalyq baqylaýlar men tekserý, anamnez jınaý, klınıkalyq-zerthanalyq jáne aspaptyq zertteýlerdiń derekteri negizinde dıagnozdy belgileý.
- Aýrýlardyń erte jáne jasyryn túrlerin jáne qaýip faktorlaryn anyqtaý.
- Pasıentterdiń eńbekke jaramsyzdyq jaǵdaıyn anyqtaý jáne medısınalyq áleýmettik saraptamaǵa jiberý.
- Densaýlyq jaǵdaıyna taldaý júrgizý jáne medısınalyq qujattamany júrgizý.
- Medısınalyq etıka jáne ishki eńbek tártibiniń, órtke qarsy qaýipsizdik pen sanıtarlyq-epıdemıologıalyq rejımniń erejelerin saqtaý.
Biliktiligin arttyrý jáne bolashaqqa jospar
Irada Kúrdaeva únemi óz biliktiligin arttyrý úshin jumys isteıdi, qosymsha bilimge nazar aýdarady jáne ýaqyt bóledi. Onyń jumys qabilettiligi, stresske tózimdiligi, jaýapkershiligi, jańa tehnologıalardy ıgerýge umtylýy jáne ony ońaı ári tez úırenýi bolashaqta saýatty maman etetini anyq. Eger jas dárigerler qatarynda Irada Kúrdaeva sıaqty tabysty jáne izdenimpaz mamandar bolsa, qazaqstandyq medısınanyń bolashaǵy zor bolatynyna senimdimiz.