Ortalyq Azıanyń arheologıalyq artefaktileriniń restavrator-ǵalymynyń mereıtoıy
2022 jylǵy 2 jeltoqsanda QazUÝ bas murajaıynda belgili restavrator, «Qyrym araly» ǵylymı-qalpyna keltirý zerthanasynyń negizin qalaýshy jáne jetekshisi Qyrym Altynbekovtiń 70 jyldyǵyna arnalǵan «Tarıhı-mádenı mura obektilerin qalpyna keltirý jáne qaıta qurý» halyqaralyq ǵylymı-tájirıbelik konferensıasy ótti, dep habarlaıdy Almaty-akshamy.kz.
Uly dalanyń kóne mádenıeti men baı murasyn zerttep, qalpyna keltirýge qyryq jyldan astam eńbek jolyn arnaǵan sýretshi-restavrator, Qazaqstan Sýretshiler odaǵynyń múshesi, Majarstannyń «Rysarlyq Kres» ordeniniń ıegeri, álemdegi iri sáýlet saraıy Lývrda tájirıbe alǵan Qyrym Altynbekovtiń 70-jyldyq mereıtoıyna arnalǵan jyljymaly kórmeniń saltanatty ashylýy boldy.
Sonymen qatar, tarıh fakúltetinde Qyrym Altynbekov atyndaǵy foıe ashyldy.
Q.Altynbekov túrli álem murajaılarynda qoıylǵan 1 000 astam tarıh jáne mádenıet, ejelgi qoldanbaly óner eskertkishterin qalpyna keltirgen, Orta Azıanyń arheologıalyq artefaktaryn qalpyna keltirý boıynsha jetekshi ǵalym-restavrator, «Qyrym araly» ǵylymı-qalpyna keltirý zerthanasynyń negizin qalaýshy jáne jetekshisi, QR Kórkemóner akademıasynyń tolyq múshesi.
Mýzeı qundylyqtarynyń konservasıasy men qaıta qalpyna keltirý isine óz ómirin arnaǵan Q.Altynbekovtyń álem mýzeılerinde bolǵan kórmesi endi QazUÝ mýzeıiniń tórinen oryn aldy. Kórermenderdi áıgili bizdiń «Úrjar sáýegeıi» men «Taqsaı hanshaıymy», ejelgi kóshpelilerdiń kıimderi men atrıbýttary, álemge áıgili: «Altyn adam», «Berel jylqylary», «Sarmat kósemi» t.b. arheologıalyq oljalardyń qalpyna keltirilýi týraly málemetter bar. «Úrjar hanshaıymy» tabylǵan eskertkish bizdiń jyl sanaýymyzǵa deıingi IV-İİİ ǵasyrlarǵa jatady.
«Qyrym Altynbekovtyń bul kórmesi tek Qazaqstanda ǵana emes Reseıde, Avstrıada, Belgıada, Vengrıada, Koreıada, Qytaıda, AQSH-ta, Túrkıada jáne basqa da elderde qoıylǵan jáne álemdik ǵalymdardyń kóshpendiler tarıhyna degen qyzyǵýshylyǵyn arttyryp keledi. Kórmege aǵash, keramıkalyq ydystar, «múıiz» oıý-órnegimen bezendirilgen, altyn jáne baǵaly tastar men kómkerilgen áshekeıler, hanshaıymdardyń qoldanǵan aına-taraqtary, t.b jádigerler qoıyldy. Bul kórme jeltoqsan aıynyń sońyna deıin ýnıversıtettiń ortalyq (rektorat) mýzeıinde bolady»,- deıdi Mýzeı jetekshisi Ardaq Júmekeqyzy.
Kórmeniń ashylýyna Qazaqstan Respýblıkasy Sýretshiler odaǵynyń Basqarma tóraǵasy Ó.O.Jubanıazov, «Almaty qalasy mýzeıler birlestigi» KMQK dırektory L.Q.Saǵyndyqova, «Tańbaly» memlekettik tarıhı-mádenı jáne tabıǵı qoryq mýzeıiniń dırektory M.O.Ámirǵalıev, T.Júrgenov atyndaǵy QUÓA rektory A.Satybaldy, sonymen qatar Á.Marǵulan atyndaǵy Arheologıa ınstıtýty, QR Memlekettik Ortalyq mýzeıi, Á.Qasteev atyndaǵy Óner mýzeıi, QR Jazýshylar Odaǵy, «Esik» memlekettik tarıhı-mádenı mýzeı qoryǵynyń ókilderi men t.b. óner, mádenıet, qoǵam qaıratkerleri qatysty.
Atalǵan kórme jeltoqsan aıynyń sońyna deıin jalǵasady.