Almatynyń Bostandyq aýdanynda kúrdeli jóndeýden keıin 280 oryndyq memlekettik balabaqsha ashyldy, dep habarlaıdy almaty-akshamy.kz
Bostandyq aýdanynda №113 memlekettik balabaqsha kúrdeli jóndeýden keıin óz esigin ashty. Jóndeý jumystary 2021 jyldyń qyrkúıeginde bastaldy, olardy «SKS Injınırıń» JSHS merdigerlik uıymy júrgizdi. Aıta keterligi, jóndeý merzimi merdigerdiń mindettemelerdi ýaqtyly oryndamaýyna baılanysty uzardy, nátıjesinde sot tártibimen oǵan aıyppul salyndy.
Búgingi tańda balabaqsha ǵımaratynyń shatyry men qasbeti tolyǵymen jóndeldi, ishki bólmelerde de jóndeý jumystary júrgizildi. Ǵımaratta tereze jáne esik bloktary, elektrmen jabdyqtaý, jylytý, sýmen jabdyqtaý jáne sý burý júıesi aýystyryldy, úı-jaılardy árleý júrgizildi, qasbeti oqshaýlanǵan jáne qaptalǵan. Beınebaqylaý, baqsha aýmaǵyn jaryqtandyrý ornatyldy. Ǵımarat tek syrtynan ǵana emes, ishinen de tolyq ózgerdi.
Búgingi tańda nysan balalardy sapaly mektepke deıingi bilim berýmen qamtamasyz etý úshin barlyq qajetti jabdyqtarmen jabdyqtalǵan. 2023 jyldyń 25 jeltoqsanynan bastap balalardy qabyldaý bastaldy.
Balabaqshada barlyǵy 12 top jumys isteıdi. Oryndar sany 280 tárbıelenýshige arnalǵan jáne qazirgi ýaqytta balabaqsha jartysyna toldy. Balalardy balabaqshaǵa qabyldaý balabaqsha tolyq toltyrylǵanǵa deıin Valabagsha bilimalmaty saıty arqyly júzege asyrylady.
Aıta keterligi, 2023 jyly Almatyda taǵy 3 memlekettik balabaqshada kúrdeli jóndeý jumystary bastaldy – №70, №163, №168. Bul rette Túrksib aýdanynda ornalasqan №70 memlekettik arnaıy bóbekjaı-baqshasyn jóndeý aıaqtaldy jáne jaqyn arada ol paıdalanýǵa beriledi. №163 jáne №168 balabaqshalardy 2024 jyldyń sońyna deıin jóndeý josparlanýda.
Sondaı aq 2024 jyly taǵy 6 balabaqsha ǵımarattaryna kúrdeli jóndeý júrgizý josparlanýda: №37, №153, №20, №10, №137 jáne №158.
Sonymen qatar, qalada «Aqjar», «Altyn Besik» jáne «Jas Qanat» shaǵyn aýdandarynda 700 oryndyq úsh jańa balabaqsha salynýda. Olardy aǵymdaǵy jyldyń 2-toqsanynda aıaqtaý josparlanýda. Bul búgingi tańda Bostandyq aýdanynda 2300 oryndy quraıtyn mektepke deıingi bilim berý uıymdarynda oryn tapshylyǵyn azaıtýǵa kómektesedi.
Eske salsaq, 2023 jyly mektepke deıingi bilim berý salasynda 5905 oryndyq 85 jańa mektepke deıingi uıym ashyldy. Olardyń ishinde 290 oryndyq bir memlekettik balabaqsha jáne 5615 oryndyq 84 jeke balabaqsha bar.