Bıyl qazaq biliminiń qarashańyraǵy – ál-Farabı atyndaǵy Qazaq ulttyq ýnıversıtetine 90 jyl tolyp otyr. Sonaý 1934 jyldyń 15 qańtarynda qabyrǵasy qalanǵan oqý ordasy osynaý ataýly kúnge oraılastyryp, óziniń mereıtoılyq is-sharalaryn bastap ta ketti. Jyl boıy toılanatyn mereıtoılyq is-sharalardyń alǵashqysy – ýnıversıtet bazasynda hımıalyq galvanıkalyq qaptamalar shyǵaratyn Chemical Coating innovations ǵylymı-óndiristik ortalyqtyń tusaýy kesildi.
Ortalyqtyń ashylý rásimine Almaty qalasynyń ákimi Erbolat Dosaev, QR Ǵylym jáne joǵary bilim vıse-mınıstri Darhan Ahmed-Zakı, Ál-Farabı atyndaǵy QazUÝ-dyń Basqarma tóraǵasy – rektory Janseıit Túımebaev, oqý ordasynyń oqytýshy-professorlar quramy men ǵalymdary qatysty.
Atalmysh joba QR ǴJBM Ǵylym qorynyń qarjylaı qoldaýymen júzege asyp otyr. Munda oqý ordasynyń ǵalymdary mashına jasaý jáne tehnıkalyq qural jasaý qajettilikteri úshin, sondaı-aq kádesyılar men zergerlik buıymdardy óńdep, arnaıy galvanıkalyq qaptamalar shyǵarýmen aınalysatyn bolady. Ortalyqtyń ashylý saltanatyna jınalǵandar aldymen óndiristi aralap, onyń materıaldyq-tehnıkalyq bazasymen tanysty. Jańa jobanyń jetekshisi Alına Ǵalıeva qonaqtarǵa ǵylymı-óndiristik ortalyq týraly aıtyp, keńinen tanystyrdy.
Mereıtoıdyń ashylý saltanatyna arnaıy kelgen Ǵylym jáne joǵary bilim vıse-mınıstri Darhan Ahmed-Zakı ýnıversıtet ǵalymdarynyń atqaryp otyrǵan jumysyna joǵary baǵa berip, otandyq ǵylymdy órkendetý úshin zamanaýı óndiristerdi damytýdyń asa mańyzdy ekenin jetkizdi.
Óz kezeginde QazUÝ basshysy Janseıit Túımebaev ortalyqtyń mańyzy týraly aıta kele, «QazUÝ-da daıyndalatyn galvanıkalyq qaptamalar ónimniń qyzmet etý merzimin uzartady. Iaǵnı bul óndirýshige de, tutynýshyǵa da paıdaly. Bul eń aldymen – tat basýdan qorǵaýdyń jańa ári tıimdi ádisi. Sondaı-aq, jańa ortalyq óndiris tehnologi jáne operatory mamandaryn daıarlaıdy», – dep atap ótti.
Osynaý jobanyń basy-qasynda júrgen «Chemical Coating innovations» ǵylymı-óndiristik ortalyǵynyń jetekshisi Alına Ǵalıeva qonaqtarǵa bul júıeniń tıimdiligi týraly baıandaı kele: «Búginde elimizde elektrohımıalyq qaptamalardy jasaý jumysy qarqyndy damyp jatyr dep aıta almaımyz. Óıtkeni, osy kúnge deıin mundaı ǵylymı-óndiristik ortalyqtar bolǵan joq. Elektrohımıalyq qaptamalardyń qasıeti men quny óte tıimdi jáne tájirıbede berik bolady. Qazirgi ýaqytta bizdiń ortalyqta myryshtaý, nıkelmen qaptaý jáne mys óńdeý jelileri ornalasqan qoıma bar. Óndiris jylyna on myńdaǵan sharshy metr qaptamalar alýǵa múmkindik beredi», – dedi.
Jańadan ashylǵan ortalyq mamandary aldaǵy ýaqytta ártúrli agressıvti ortadan qorǵaıtyn qaptamalardy alý jáne qoldaný tehnologıalaryn ázirleýdi de josparlap otyr.
Sonymen, atalmysh jobany iske asyrý ónerkásip sektorynyń naqty suranysyna negizdelip otyr. Máselen, temirjol salasynyń alpaýyty sanalatyn fransýzdyq ALSTOM kompanıasynyń tehnologıasy boıynsha temirjol avtomatıkasyn shyǵaratyn mashına jasaý zaýyty – «QazElektroPrıvod» BK JSHS halyqaralyq standarttarǵa sáıkes qaptalatyn qorǵaý qaptamalaryn alý tehnologıalary men qyzmetterin qajet etedi. Osy suranystarǵa oraı, Ál-Farabı atyndaǵy QazUÝ-da elektrohımıalyq tehnologıalardyń tutas júıesi ázirlenip, olardyń ishinde ártúrli maqsattaǵy elektrolıttik qaptamalardy alý tehnologıalary komersıalandyrýǵa usynylatyn bolady
Jańa ortalyqtyń ashylý saltanatynan soń, oqý ordasynyń ál-Farabı kitaphanasynda mereıtoıdyń resmı bólimi bastaldy. Qonaqtar men oqý ordasynyń túlekteri ýnıversıtet tarıhyna arnalǵan sırek fotosýretter men kitaptardyń kórmesin tamashalady. Sonymen qatar, ýnıversıtettiń 90 jyldyǵyna arnalǵan kitaptardyń ekspozısıasy usynyldy.
Aldymen qonaqtar qarashańyraqtyń qalyptasý dáýirinen syr shertetin shejirege toly derekti fılmdi tamashalady.
Alǵashqy sóz kezegin alǵan Basqarma tóraǵasy, ýnıversıtet rektory Janseıit Túımebaev tarıhyn tereńge tartqan bilim men ǵylymnyń keni bolǵan oqý ordasynyń osynaý jyldar ishinde júrip ótken joly men tabysqa toly tarıhynan syr shertti. Oqý ordasynyń táýelsiz elimizdiń damýy men qalyptasýyna zor úles qosqanyn maqtanyshpen atap ótti.
Kelesi kezekte Almaty qalasynyń ákimi Erbolat Dosaev ýnıversıtettiń elimizdiń bilim salasy úshin asa mańyzdy ekenin aıtyp, oqý ordasynyń ujymyn aıtýly mereıtoımen quttyqtady.
Mereıtoı saltanatyna jınalǵandar úlken ekrannan QR Ǵylym jáne joǵary bilim mınıstri Saıasat Nurbektiń vıdeo- quttyqtaýyn tyńdady.
Osynaý jyldar boıy qarashańyraq qabyrǵasynda eńbek etip, elimizdiń bilimi men ǵylymyna ólsheýsiz úles qosqan ýnıversıtet oqytýshylary «Ǵylymdy damytýǵa sińirgen eńbegi úshin», «Ana tilin damytýǵa qosqan úlesi úshin», Y.Altynsarın tósbelgilerimen, sonymen qatar QR Ǵylym jáne joǵary bilim mınıstriniń Qurmet gramotasymen, Alǵys hatymen jáne oqý ordasynyń eń joǵary marapaty «Eren eńbegi úshin», «Eńbek ardageri» medalimen marapattaldy.
Osynaý oqý ordasynyń myńdaǵan túlekteriniń ystyq yqylasyn QazUÝ Túlekter qaýymdastyǵynyń tóraǵasy Qaırat Mámı jetkizdi.
Ýnıversıtettiń mereıtoıyna arnalǵan saltanatty jıyn sońy stýdentterdiń konsertine ulasty.