Jelide Jetisý oblysynda aýdandyq máslıhat depýtaty Dáýren Slámovty Úsharal qalasynda pyshaqtap ketkeni týraly aqparat tarady.Muny oblystyq polısıa departamentiniń baspasóz qyzmeti rastady.
«15 qańtar kúni saǵat 15:25-te Alakól aýdandyq polısıa bólimine Úsharal qalasynda salynyp jatqan qurylys nysandardyń birinde ishimdik ishken azamat jumysshylarǵa tıisip jatqany týraly habar tústi. Kúdikti 24 jastaǵy jergilikti turǵyn jumysshylardy qorǵamaqshy bolǵan 34 jastaǵy er adamdy pyshaqtap, oqıǵa ornynan qashyp ketken», - dep habarlady polısıa.
Oqıǵa ornyna bes mınýt ishinde jetken polısıa qyzmetkerleri kúdiktini ustady. Alaıda Dáýren Slámov alǵan jaraqatynan jedel járdem kóliginde kóz jumdy.
Ustalǵan kúdikti Alakól aýdandyq polısıa bóliminiń ýaqytsha ustaý ızolátoryna qamaldy. Atalǵan fakti boıynsha qylmystyq is qozǵalyp, qajetti saraptamalar taǵaıyndaldy.