6 myńnan astam adam profılaktıkalyq esepke alynǵan.
Arnaıy komısıa olarǵa qatysty 1800 isti qarady. Sottyń sheshimimen 600 adam ata-ana quqyǵynan aıyryldy. Taǵy 340 adamnyń quqyǵy shektelgen. Bul týraly İshki ister mınıstrliginiń ókili brıfıńte aıtty, dep habarlaıdy Almaty-akshamy.kz.
Vedomstvo ótken jyldyń sońynda memlekettik organdarmen birlesip, jasóspirimderge qatysty zorlyq-zombylyq pen býllıngtiń aldyn alý jáne kómek kórsetý ádistemesin jasapty. Sonyń aıasynda olardyń qaýipsizdigin qamtý sharalary kúsheıtilip jatyr.
«Jasóspirimder arasynda bopsalaýǵa qatysty 40 derek anyqtaldy. Ár óńirde zorlyq-zombylyqpen kúresý jáne aldyn alý úshin ákimdikter janynan vedomstvoaralyq mobıldi toptar jumys isteıdi. Sońǵy 10 jyl ishinde kámelet jasqa tolmaǵandarǵa qatysty quqyqbuzýshylyq derekteri 3 ese azaıdy. Olardyń qaýipsizdigi odan ári basty nazarda bolady», - deıdi QR İİM Ákimshilik polısıa komıtetiniń basqarma bastyǵy Áset Ospanov.