QR Áleýmettik kodeksiniń kúshine enýimen 2023 jylǵy 1 shildede elimizde memlekettik áleýmettik qorǵaý ınspektorlarynyń ınstıtýty engizildi, onyń quzyretine múgedektigi bar adamdardy áleýmettik qorǵaý, arnaýly áleýmettik qyzmetter kórsetý jáne áleýmettik qamsyzdandyrý salasyndaǵy zańnamanyń saqtalýyn baqylaýdy júzege asyrý kiredi.
2024 jyldyń basynan beri áleýmettik ınspektorlar 204 tekserý júrgizdi, onyń 29-y profılaktıkalyq baqylaý sheńberinde, 175-i jospardan tys tekserýler boldy, dep habarlaıdy Almaty-akshamy.kz Eńbek jáne halyqty áleýmettik qorǵaý mınıstrligine silteme jasap.
Memlekettik baqylaýmen qamtyldy: ákimdikter – 16, jergilikti atqarýshy organdar basqarmalary – 2, jumyspen qamtý jáne áleýmettik baǵdarlamalar bólimderi – 2, mektepter – 167, dúkender – 4, arnaýly áleýmettik qyzmetter kórsetý ortalyqtary – 2, mádenıet úıi – 1, bank fılıaly – 1, notarıýs – 1, muraǵat – 1, balabaqsha – 1, kolej – 1, kafeler, meıramhanalar – 2, JK – 3.
Máselen, Eńbek jáne áleýmettik qorǵaý komıtetiniń Qostanaı oblysy boıynsha departamenti qoǵamdyq birlestik ókilderiniń ótinishi negizinde múgedektigi bar adamdar úshin qoljetimdiliktiń bolmaý faktisi boıynsha saýda obektisine jospardan tys tekserý júrgizdi. Tekserý nátıjeleri boıynsha iri kásipkerlik sýbektisi aıyppul túrinde ákimshilik jaýapkershilikke tartyldy, anyqtalǵan buzýshylyqtardy joıý týraly nusqama engizildi.
Sonymen qatar, óńirlerdegi áleýmettik ınspektorlar múgedektigi bar adamdardyń zańdy quqyqtaryn qamtamasyz etý úshin áleýmettik ınfraqurylym obektileriniń beıimdelý is-sharalaryn júrgizýde oń dınamıkany atap ótti.
Birinshi top múgedektigi bar Erqulan Shamshetovtyń aıtýynsha, Aqtóbe qalasynda múgedektigi bar adamdar úshin áleýmettik ınfraqurylym nysandaryna qoljetimdilik aıtarlyqtaı jaqsardy.
«Jubaıym ekeýmiz 12 shaǵyn aýdandaǵy № 3 emhanaǵa baramyz. Emhana sońǵy úlgide salynǵan, dálizder keń, pernosaly óte meıirimdi, ǵımarat ishinde arbada júrýge óte yńǵaıly, lıft te qarastyrylǵan. Jubaıymda da birinshi top múgedektigi bar, emhanada biz arbamen kedergisiz júremiz, jaıly jaǵdaı jasaǵany úshin óte rızamyz», – dedi Erqulan Shamshetov.
Sonymen qatar, QR Eńbekmıni Eńbek jáne áleýmettik qorǵaý komıtetiniń aýmaqtyq departamentteri 2023 jyly 1 783 tekserý júrgizip, anyqtalǵan buzýshylyqtardy joıý týraly 1 171 uıǵarym berdi, 98,4 mln teńgeden astam somaǵa 467 aıyppul saldy.