Bıyl -Balalar jyly.
Osyǵan oraı elimizde balalardyń baqytty bolashaǵy úshin kóptegen is-sharalar qolǵa alynyp, olardyń densaýlyǵy men ómirin jaqsartýǵa aıryqsha mán berilýde. Al deni saý bala tek bir áýlettiń ǵana emes, qoǵamnyń da basty baılyǵy ekeni aıtpasa da túsinikti. Mine, osyǵan oraı Almaty qalalyq №29 emhananyń pedıatrıalyq bólimi 1 maýsym - Halyqaralyq balalardy qorǵaý kúnine oraı «Bala– bizdiń basty baılyǵymyz!» degen úndeýmen balalarǵa arnalǵan Ashyq esik kúnin uıymdastyrýda.
"Ashyq esik kúni aıasynda jańa týylǵan náresteden bastap 14 jasqa deıingi jasóspirimder tolyq dárigerlik tekserýden ótkizilip, qandaı da bir syrqaty anyqtalǵandary dıspanserlik esepke alynady. Al emdeý-saýyqtyrý qajettiligi týyndaǵan balalarǵa qalamyzdaǵy mamandandyrylǵan aýrýhanalar men shıpajaılarǵa joldama beriledi", - deıdi emhananyń bas dárigeri Aqmıra Sadyqova.
Qazirgi tańda bul emhanada 52 myńnan astam qala turǵyndary esepte tursa, onyń 23 myń 200-den astamy bala. On tórt jasqa deıingi balalar sany 21 myńdy quraıdy. Esepte turǵan ár bala tıisti maman dárigerlerdiń baqylaýynda. Osy rette №29 emhana qalamyzdaǵy pedıatrlyq bólimdi saqtap otyrǵan birden-bir alǵashqy dárigerlik kómek kórsetetin ujym ekenin atap ketken jón. Búginde emhanada 5 pedıatrlyq ýchaske jumys isteıdi.