2025 jylǵy 4 naýryzda Ázerbaıjan astanasy Bakýde Qazaqstannyń jetekshi ýnıversıtetteri qatysqan bilim kórmesi ótti. İs-shara barysynda ázerbaıjandyq joǵary synyp oqýshylary men stýdentterge Qazaqstannyń bilim berý júıesi, akademıalyq baǵdarlamalary jáne joǵary oqý oryndarynyń múmkindikteri tanystyryldy, dep habarlaıdy aqshamnews.kz
Kórmege Qazaqstannyń 23 ýnıversıteti qatysyp, olardyń qatarynda Almaty qalasynyń bedeldi joǵary oqý oryndary da boldy. Atap aıtqanda:
- Qazaq ulttyq qyzdar pedagogıkalyq ýnıversıteti
- Q.I. Sátbaev atyndaǵy Qazaq ulttyq zertteý tehnıkalyq ýnıversıteti
- Gýmarbek Dáýkeev atyndaǵy Almaty energetıka jáne baılanys ýnıversıteti
- Almaty Management University (AlmaU)
- SDU ýnıversıteti
- Turan ýnıversıteti
İs-sharanyń ashylýynda Qazaqstan Respýblıkasynyń Ázerbaıjandaǵy Elshisi Álim Baıel sóz sóılep, bul kórmeniń eki el arasyndaǵy bilim berý yntymaqtastyǵyn jańa deńgeıge kóteretinin atap ótti. Onyń aıtýynsha, Qazaqstan men Ázerbaıjan búginde tek seriktes elder ǵana emes, shynaıy odaqtastarǵa aınaldy. Bul áriptestik joǵary bilim men ǵylym salasynda da qarqyndy damyp keledi.
Kórme aıasynda demeýshilerdiń qoldaýymen arnaıy utys oıyndary uıymdastyrylyp, jeńimpazdarǵa Qazaqstanǵa tegin avıabıletter, kitap dúkenderine sertıfıkattar, fıtnes-zalǵa abonementter jáne qundy syılyqtar tabystaldy. Sonymen qatar, qazaqtyń ulttyq taǵamdary men qolóner buıymdary usynylǵan qaıyrymdylyq jármeńkesi ótti.
Sol kúni ADA Ýnıversıtetinde Qazaqstan men Ázerbaıjannyń jetekshi joǵary oqý oryndarynyń basshylary qatysqan dóńgelek ústel uıymdastyryldy. Otyrysta Qazaqstannyń Ǵylym jáne joǵary bilim mınıstri Saıasat Nurbek pen Ázerbaıjannyń Ǵylym jáne bilim mınıstri Emın Amrýllaev sóz sóılep, eki eldiń joǵary bilim salasyndaǵy yntymaqtastyqty odan ári nyǵaıtýǵa nıetti ekenin jetkizdi.
Saıasat Nurbek Qazaqstanda joǵary bilim men ǵylym salasynda aýqymdy reformalar júrgizilip jatqanyn atap ótti. Onyń aıtýynsha, elimiz aımaqtyq bilim berý habyna aınalyp, bedeldi sheteldik ýnıversıtetter óz fılıaldaryn ashýda. 2024 jyly Qazaqstanda 31 myńnan astam sheteldik stýdent bilim alǵan, al jas ǵalymdarǵa qoldaý kórsetý men ǵylymı zertteýlerdi komersıalandyrý jumystary júıeli túrde júzege asyrylýda.
Óz kezeginde, Emın Amrýllaev Ázerbaıjannyń Qazaqstanmen joǵary bilim jáne ǵylym salasyndaǵy seriktestikti tereńdetýge múddeli ekenin málimdedi. Ol bilim berý strategıalary, ýnıversıtetter arasyndaǵy yntymaqtastyq pen ınovasıalyq tásilderdi engizý baǵytynda belsendi jumys atqarylyp jatqanyn aıtty.
Dóńgelek ústel qorytyndysy boıynsha qazaqstandyq jáne ázerbaıjandyq ýnıversıtetter arasynda 40 ózara túsinistik memorandýmyna qol qoıyldy. Mınıstrler akademıalyq utqyrlyqty damytý, birlesken ǵylymı zertteýler júrgizý jáne bilim salasyndaǵy yntymaqtastyqty keńeıtý máselelerine basa nazar aýdarýǵa ýaǵdalasty.
Sonymen qatar, Qazaqstannyń Ǵylym jáne joǵary bilim mınıstrligi men Ázerbaıjannyń Joǵary atestattaý komısıasy arasynda ǵylymı jarıalanymdardy yntymaqtastyq aıasynda ázirleýge qatysty mańyzdy kelisim jasaldy. Bul kelisim 2025 jylǵy 3 naýryzda Qazaqstan Premer-Mınıstriniń Ázerbaıjanǵa resmı sapary barysynda bekitilgen bolatyn.
Bul bilim kórmesi men dóńgelek ústel eki el arasyndaǵy ǵylymı jáne akademıalyq baılanystardy nyǵaıtýǵa úlken serpin berip, Qazaqstan men Ázerbaıjannyń joǵary bilim salasyndaǵy áriptestigin jańa deńgeıge kóteredi