Almatyda Halyqaralyq áıelder kúnine arnalǵan aýqymdy is-sharalar baǵdarlamasy daıyn. Mereke qarsańynda qala turǵyndary men qonaqtary konsertter, kórmeler, teatr qoıylymdary jáne shyǵarmashylyq kezdesýlerdi tamashalaı alady, dep habarlaıdy aqshamnews.kz
6 naýryz kúni saǵat 11:00-de Ahmet Baıtursynuly mýzeı-úıinde «Alash arystary jubaılary» atty tanymdyq dáris ótedi. İs-sharaǵa Alash arystary urpaqtary Aıman Baısalova, Merýert Bákibaıqyzy, Janara Súleımanova, Jazıra Arǵyn jáne zertteýshi ǵalym qyzdar Svetlana Smaǵulova, Bekzada Qojekeeva, Gúljahan Orda, mýzeı qyzmetkerleri, JOO stýdentteri, qala turǵyndary men qonaqtary qatysady. Jıynda alash qaıratkerleri jubaılarynyń róli men olardyń ómirlik serikterine yqpaly talqylanady. Konferensıada sırek tarıhı málimetter men jańa zertteýler usynylady.
6 naýryzda saǵat 15:00-de, Almaty mýzeıinde «Dástúr. Óner. Ádemilik» atty kórme ashylady. Munda mýzeı qoryndaǵy dástúrli bas kıimder koleksıasy men sýretshi Gúlnár Tabanovanyń jumystary qoıylady.
7 naýryzda saǵat 18:30-da «Alataý» dástúrli óner teatrynda «Anaǵa taǵzym» atty merekelik konsert ótedi. Sahnada belgili ónerpazdar Áset Esjan, Shattyq Ýatqan, Nurbolat Uzaqbaı, Dıas Murathan, Tilek Bazarov jáne Narıman Ábdirahman óner kórsetedi.
8 naýryzda birqatar merekelik is-shara ótedi. Saǵat 17:00-de Yqylas atyndaǵy halyq mýzykalyq aspaptar mýzeıinde «Iirim» tobynyń «Álemniń syıy – áıelge» atty konserti ótedi. Qýyrshaq teatry «Mama dlá Mamontenka» spektaklin qazaq tilinde saǵat 14:00-de, orys tilinde saǵat 12:00-de sahnalaıdy. Anasyz qalǵan mamonttyń anasyn tabýǵa degen talpynysy týraly áserli oqıǵa balalar men eresekterdiń júregin jylýlyqqa, janashyrlyqqa bólep, armandaryna umtylýǵa shaqyrady.
Osy kúni, saǵat 19:00-de «Artıshok» teatrynda «Samruq» bı trýppasy «Aýyl» qoıylymyn sahnalaıdy. İs-shara zamanaýı horeografıa festıvali aıasynda ótedi.
Sonymen qatar, 7 jáne 8 naýryzda Almaty halyqaralyq áýejaıynda Almaty qalasynyń tarıhy mýzeıi qoryndaǵy dástúrli zergerlik buıymdardyń kóshpeli kórmesi uıymdastyrylady.
Qalanyń ártúrli aýdandarynda da merekelik is-sharalar ótedi:
- Naýryzbaı aýdanynda 6 naýryzda saǵat 11:00-de, Inovasıalyq shyǵarmashylyq ortalyǵynda (Shuǵyla, 347/4) «Halyqaralyq áıelder kúni» atty konserttik baǵdarlama ótedi;
-Alataý aýdanynda – 6 naýryzda saǵat 15:00-de, Inovasıalyq shyǵarmashylyq ortalyǵynda (Nurkent sh/a., 14a) konsert ótedi;
- Túrksib aýdanynda – 6 naýryzda saǵat 16:00-de, Oqýshylar úıinde (Seıfýllın dańǵyly, 13/1) merekelik konsert ótedi;
-Medeý aýdanynda – 7 naýryzda saǵat 11:00-de, Jambyl atyndaǵy fılarmonıada (Tóle bı kóshesi, 21, Qaldaıaqov kóshesi, 35 qıylysy) merekelik konsert ótedi;
-Jetisý aýdanynda – 7 naýryzda saǵat 12:00-de, mádenıet úıinde (Esim han kóshesi, 127) merekelik konsert ótedi.
Almaty qalasynyń komúnıtı-ortalyqtarynda da birqatar is-shara ótedi:
-Jetisý aýdanynyń komúnıtı-ortalyǵynda – 6 naýryzda saǵat 16:00-de qazaqsha áshekeı buıymdar jasaý boıynsha «Qyzdar-ai» atty sheberlik dárisi ótedi;
-Almaly aýdanynyń komúnıtı-ortalyǵynda – 6 naýryzda saǵat 19:00-de jastarǵa arnalǵan kvız uıymdastyrylady;
-Jetisý aýdanynyń komúnıtı-ortalyǵynda – 7 naýryzda saǵat 15:00-de «Ananyń beınesi» atty fotokórme men qoldanbaly óner kórmesi ótedi;
-Bostandyq aýdanynyń komúnıtı-ortalyǵynda – 7 naýryzda saǵat 18:00-de tekstýraly kartınalar jasaý boıynsha sheberlik dárisi ótedi.