Baıqaý «Salaýatty tamaqtaný mektebi» baǵdarlamasynyń 10 jyldyǵyna arnalady.
Astanada «Salaýatty tamaqtaný mektebi» baǵdarlamasyn júzege asyrýǵa qatysatyn bastaýysh synyp pedagogteri arasynda jyl saıynǵy respýblıkalyq ádistemeler baıqaýynyń qorytyndysy shyǵaryldy, dep habarlaıdy Almaty-akshamy.kz
Baıqaý Astana qalasy ákimdiginiń «Ádistemelik ortalyǵy», Almaty qalasy bilim basqarmasynyń «Qalalyq bilim berýdegi jańa tehnologıalardyń ǵylymı-ádistemelik ortalyǵynyń» qoldaýymen uıymdastyryldy.
Jyl saıyn ótkiziletin baıqaý bastaýysh synyp oqýshylarynyń boıynda durys tamaqtaný negizderin qalyptastyrý boıynsha muǵalimderdiń úzdik tájirıbelerin taratýǵa, basqa qalalardaǵy áriptesteriniń jumys tájirıbesimen tanysýǵa múmkindik beredi. Baıqaý 2013 jyldan bastap Astana jáne Almaty qalalarynyń mektepterinde iske asyrylyp kele jatqan «Salaýatty tamaqtaný mektebi» baǵdarlamasynyń ajyramas bóligi bolyp tabylady.
Osynaý dástúrli baıqaý bıylǵy jyly erekshe mańyzǵa ıe bolýda. Atap aıtsaq, baıqaý «Salaýatty tamaqtaný mektebi» baǵdarlamasynyń 10 jyldyǵyna arnalady. Bilim berýdegi zamanaýı úrdisterge, onyń ishinde oqytý praktıkasyna ınovasıalyq pedagogıkalyq-ádistemelerdi engizýge ońtaıly yqpal jasaýdy kózdeıtin baıqaýǵa muǵalimderdiń 50-den astam jarqyn jáne joǵary kásibı jumystary tústi. Baıqaýǵa qatysýshylar bastaýysh synyp oqýshylaryn salaýatty ómir saltynyń negizderimen, durys tamaqtanýmen, sondaı-aq óz eliniń aspazdyq dástúrleri men ádet-ǵuryptarymen tanystyrýdyń qyzyqty jáne tıimdi tásilderin qarastyrdy.
Qalalyq kezeńde (Almaty, Astana qalalarynyń) júldeli oryndy ıelengen jenimpaz ustazdar baıqaýdyń fınalyna qatysyp, baq synady. Ádilqazylar alqasynyń qorytyndysy boıynsha:
Bas júlde – Kamıla Ábdirazaqova, №119 mektep, Almaty q.,
1-oryn – Sahıda Ahmetova, №105 mektep, Almaty q.,
2-oryn – Asemgýl Aýbakırova, №4 mektep, Astana q.
3-oryn – Saıda Imırova, Almaty q. № 78 mektep, Qaldygúl Atymtaeva, Astana q. №51 mektep, Roza Arzekýlova, Astana q. №50 mektep muǵalimderi ıelendi.
Muǵalimderdiń kásibı sheberligin shyńdaýǵa, bilim berý sapasyn arttyrýǵa jeteleıtin baıqaýdyń ozyq tájirıbe, úzdik ádistemelermen bólisý alańy retinde kómegi mol ekendigin «Salaýatty tamaqtaný mektebi» baǵdarlamasynyń Astana jáne Almaty qalalary boıynsha úılestirýshileri: Astana ákimdiginiń ádistemelik ortalyǵynyń ádiskeri Roza Shaıahanova, Almaty qalasy bilim basqarmasy QBBJTǴÁ ortalyǵynyń bólim bastyǵy Tatána Ejova jeńimpazdardy marapattaý saltanatynda atap ótti.
2013 jyldan bastap «Salaýatty tamaqtaný mektebi» baǵdarlamasyn júzege asyrýǵa atsalysyp otyrǵan Almaty, Astana qalalarynyń pedagogteri oqýshylaryn durys tamaqtaný mádenıetine tárbıeleýde. Baǵdarlama 6-8 jastaǵy balalarǵa baǵyttalǵan jáne muǵalimder ótkizetin sabaqtar júıesi arqyly júzege asyrylady. Ol Qazaq tamaqtaný akademıasymen jáne «Órleý BAUO» AQ birlesip ázirlendi. Baǵdarlama sheńberinde 60 000-ǵa jýyq bala «Salaýatty tamaqtaný mektebimen» tanysty. Osyndaı eńbek nátıjesiniń qorytyndysy ispetti baǵdarlama ádisteriniń baıqaýy muǵalimder arasynda úlken qyzyǵýshylyq týdyrýda.