Almatyda Azamattyq bastamalardy qoldaý ortalyǵynyń uıymdastyrýymen «Teatr» nomınasıasyndaǵy festıvál-baıqaýy ótti
Teatr - kez kelgen halyqtyń, árıne, sonyń ishinde qazaq halqynyń da rýhanı bolmysynyń, mádenıetiniń, dúnıetanymynyń tuǵyry bıik asyl murasy. Halyqty estetıkalyq adamgershilik pen izgilikke tárbıeleýdiń asa mańyzdy quraly da osy – teatr. Osy oraıda, Pedagogıkalyq ǵylymdar akademıasy Aqparat jáne qoǵamdyq damý mınıstrliginiń tapsyrysy boıynsha jáne Azamattyq bastamalardy qoldaý ortalyǵynyń uıymdastyrýymen «Teatr» nomınasıasyndaǵy festıvál-baıqaýyn ótkizdi.
Baıqaý ashyq túrde uıymdastyryldy. İs-sharaǵa 16–29 jas aralyǵyndaǵy jas talanttar qatysty. Onyń ishinde, mektep, ýnıversıtet jandaryndaǵy teatr ujymdary, óner birlestikteri, jas teatrlar da barshylyq. Olar elimizdiń túkpir-túkpirinen jınalǵan sańlaqtar desek, artyq aıtpaǵanymyz bolar. Baıqaýǵa elimizge tanymal teatr maıtalmandary, akterlar tórelik etti.
Uıymdastyrýshylardyń aıtýynsha, jastar arasynda teatr ónerin nasıhattaý, ónerge qyzyǵýshylyq tanytqan jastardyń shyǵarmashylyq áleýetin qoldaý jáne damytý, jas ónertanýshylar men teatr ónerpazdarynan quralǵan toptardyń jańa esimderin anyqtaý, olardyń shyǵarmashylyǵyn qoldaý basty maqsatqa aınaldy.
Atalmysh baıqaýda 1-oryndy Nur-Sultan qalasynan kelgen L.N.Gýmılev atyndaǵy Eýrazıa ulttyq ýnıversıtetiniń janynan qurylǵan «Shańyraq» teatry ıelendi. Júldeli 2-oryndy Almaty qalasyndaǵy «JasArt» óner birlestigi jeńip aldy. 3-oryndy E.A.Bóketov atyndaǵy Qaraǵandy ýnıversıtetiniń fılosofıa jáne psıhologıa fakúltetiniń «Mádenı tynyǵý qyzmeti» mamandyǵynyń stýdentterinen quralǵan «Úrker» stýdentter teatry ıelendi.
Atalǵan shara M.Áýezov atyndaǵy Qazaq ulttyq drama teatrynyń Kishi zalynda ótti.