Nur Otan partıasy Almaty qalalyq fılıalynyń tóraǵasy, Almaty ákimi Baqytjan Saǵyntaev azamattardy kezekti qabyldaýdy onlaın formatta ótkizdi.
N. Kenjebaevtyń halyqtyń múmkindigi shekteýli toptary úshin ǵımarattarǵa qoıylǵan qurylǵylarǵa qatysty suraǵy jóninde B. Saǵyntaevtyń tapsyrmasy boıynsha komısıa qurylatyn bolady. Túrli basqarmalardyń, onyń ishinde Jaıly qalalyq orta, Áleýmettik ál-aýqat basqarmalarynyń mamandary qoǵam belsendilerimen birge kótergish qurylǵylardyń tehnıkalyq jaǵdaıy men qaýipsizdigin tekseredi jáne baqylaýǵa alady.
O. Kostúlınanyń Natarov kóshesindegi jol jamylǵysyn qalpyna keltirý jónindegi ótinishi boıynsha qala ákiminiń orynbasaryna sol jerge arnaıy baryp, turǵyndarǵa ınjenerlik jelilerdi qosý jáne joldardy asfálttaý jumystarynyń aıaqtalý merzimi týraly aqparat berý tapsyryldy.
Aqjar shaǵynaýdany turǵyndarynyń atynan E. Ádilbekov Naýryzbaı aýdanyndaǵy jobaǵa enbegen Lashyn men Berel kóshelerine ınjenerlik jelilerdi tartý máselelerin surady. Almaty ákimi B. Saǵyntaev aǵymdaǵy jyly sýmen jabdyqtaý jelilerin tartýdy jáne keler jyly osy kóshelerge sý burý jelilerin salýdy jobaǵa engizýdi tapsyrdy.
Jalpy, Aqjar shaǵynaýdanynda 21 myń adam turady jáne 5,5 myń úı bar, ótken jyly 8,5 km sýmen qamtý, 6,7 km sý burý jelileri salyndy. Bıylǵy jyly 10,5 km sýmen qamtý jáne 9 km sý burý jelilerin salý josparlanýda. Aǵymdaǵy jyly shaǵyn aýdan turǵyndaryn sapaly aýyz sýmen qamtamasyz etetin Aqsaı sý tazartý stansıasynyń qurylysy bastalady.
A. Temeshtiń ótinishi boıynsha qoǵamdyq densaýlyq basqarmasyna onyń kishkentaı balasynyń densaýlyq jaǵdaıyn durys anyqtaý úshin komısıa qurýdy jáne qajet bolsa medısınalyq-áleýmettik saraptamaǵa jiberýdi tapsyrdy.
«Qamqor» áleýmettik úıinde turatyn V. Denısenkonyń suraǵyna jaýap bergen megapolıs ákimi B. Saǵyntaev psıhıonevrologıalyq patologıasy bar balalardy ońaltý qyzmetteri «Qamqor» ǵımaratynan Sháripov kóshesindegi ózge nysanǵa kóshiriletini týraly habarlady. Bul erekshe qajettilikteri bar balalardy tolyq 8 saǵattyq sabaqtarmen qamtýǵa múmkindik beredi. Ózge nysanǵa kóshirý jyl sońyna josparlanǵan.