Aıgerim SERİKQYZY, qazaq tili páni muǵalimi:
– Barlyq ıgilikterdiń eń ulysy – táýelsizdik, – dep Godvın aıtqandaı, biz táýelsizdigimizdi qurmettep, onymen maqtanýymyz kerek. Qazirgi tańda qanshama halyqtar bar óz elin, jerin, tilin, dinin qaıtarýdy armandaıtyn. Táýelsizdik úshin janyn berýden taıynbaıtyn. Sondyqtan da osy erkindigimizge shúkirshilik aıtyp, bilim jolynda, ǵylym salasynda jastyǵymyzdy, biliktiligimizdi paıdalana otyryp, elimizdi damyǵan memleketter qataryna qosýymyz qajet.
Búginde qazaq tili memlekettik tilge aınaldy. Ǵasyrlar boıy shet jerde júrgen mıllıondaǵan otandastarymyz, qandastarymyz óz atamekenine oraldy. Qazaqstanda turatyn barlyq ulttardyń tiliniń, dininiń damýyna tolyq múmkindik jasaldy.
Tilimizdiń ármen qaraı damyp, órkendeýine óz septigimizdi tıgizý maqsatynda ata-anamnyń jolyn jalǵap, ustazdyq qyzmetti tańdadym. Qazirgi tańda mektepke daıarlyq synybyndaǵy balalarǵa qosymsha sabaq beremin. Men óz tilimdi, elimdi, erkindigimdi maqtan etemin. Táýlsizdigimiz máńgilik jasaı bersin!
Raıymbek LUQPANULY, sport jattyqtyrýshysy:
– Búginde Elbasy Nursultan Nazarbaev sport salasyna aıryqsha kóńil bólýde. Sońǵy jyldary kóptegen sport nysandary salyndy. Sportqa jany qushtar jastarǵa jetistikterge jetýge mol múmkindik bar. Osy kúnge deıin olımpıadada qazaq balasy erkin kúresten jeńiske jetken joq. Meniń eń bıik maqsattarymnyń biri – kók baıraǵymyzdy jelbireter olımpıada chempıonyn daıyndap shyǵarsam deımin. Ózim bala kezimnen kúrespen aınalysamyn. Ákem de 20 jyl dál osy sport salasynda eńbek etken jan. Sol alǵash dodalarǵa qatysyp júrgen kezderi áli esimde, jerge tóseıtin durys kilem de bolmapty. Al búginde jasóspirimderge barlyq múmkindik jan-jaqty qarastyrylǵan. Tek sony utymdy paıdalaný kerek.
Táýelsizdiktiń 30 jyldyǵy merekesiniń tabaldyryǵynda turyp, osyndaı birligi myqty elde týǵanyma sheksiz baqyttymyn. Egemen elimizdiń erteńine qyzmet etýdi maqtanysh tutamyn. Týǵan jerdiń órkendeýine úles qosýdy perzenttik paryzym dep sanaımyn.
Bulan AHMETQALI, stýdent:
– Táýelsizdik alǵan az ýaqyttyń ishinde elimizde 1993 jáne 1995 jyldary eki birdeı Konstıtýsıa qabyldandy. Elimiz Prezıdenttik basqarý júıesine ótti.
Bıliktiń barlyq salalary Konstıtýsıaǵa saı qyzmet atqarýda. Memleketimizdiń quqyqtyq qatynastaryn retteıtin kóptegen zańdar, kodekster, zańnamalar qabyldanyp, memlekettik qurylystyń órken deýine súbeli úles qosylyp jatyr. Búginde árbir qazaqstandyqtyń quqyǵy qorǵalǵan. Demokratıalyq el bolǵandyqtan, jasymyz da, egde jastaǵy qarttarymyz da óz pikirlerin jetkize alady. Ózimde quqyq salasynda bilim alyp, kishigirim qyzmetter atqarǵandyqtan, táýelsizdiktiń arqasynda árbir adam óz oıyn jetkize alatyndyǵyna kózim jetti. Men táýelsiz elde ómir súrip jatqanyma qýanamyn.