Almaty bıligi áleýmettik mańyzy bar azyq-túlik taýarlarynyń baǵasynyń ósýin tejeý maqsatynda jumys istep jatyr, dep habarlaıdy aqshamnews.kz
2025 jyldyń 9 aıynda ÁMAT baǵasynyń ósimi 8,4%-dy qurady, bul ortasha respýblıkalyq deńgeıden (8,1%) sál ǵana joǵary.
Jaǵdaıdy turaqtandyrý úshin jergilikti búdjetten 12 mlrd teńge bólinip, onyń 8,3 mlrd teńgesi óndirýshilerden tikeleı baılanysyp, Magnum saýda jelisinde baǵany bekitýge jumsaldy. Óńirlik komýnıkasıalar qyzmetinde qala ákiminiń orynbasary Oljas Smaǵulov osylaı dep habarlady.
Onyń aıtýynsha, áleýmettik mańyzy bar 19 túrli taýar boıynsha barlyǵy 26 myń tonna ónimge kelisim-shart jasalǵan. Almatyǵa óndirýshilerden tikeleı úlken kólemde ónim úzbeı jetkizilip otyrady. Sonymen qatar, qys-kóktem mezgilinde kókóniske baılanysty iri jetkizýshilermen memorandýmdarǵa qol qoıyldy. Qarasha aıynan bastap keler jylǵy mamyr aıyna deıin 14 myń tonnadan astam ónim úlken saýda jelilerine jol tartady. Bul kún sýyq kezde tapshylyq pen baǵanyń aıaq asty qymbattap ketýniń aldyn alýǵa sep bolmaq.
«Biz úshin basym baǵyt – áleýmettik mańyzy bar azyq-túlik baǵasy. Bul ár otbasynyń kúnkórisine tikeleı áser etetinin jaqsy túsinemiz, sondyqtan júıeli ǵana emes, jedel áreket etemiz», – dep atap ótti Oljas Smaǵulov.
Jergilikti jáne óńirlik óndirýshilermen birlesip júıeli jumys júrgizilip jatyr, bul deldaldardy aınalyp ótip, alypsatarlyqty azaıtady.
Mundaı tásil qalanyń azyq-túlik qaýipsizdiginiń turaqty júıesin qalyptastyryp, azyq-túlikti arzandaý baǵamen jetkizip otyrýǵa múmkindik beredi.