Qalanyń áleýmettik-ekonomıkalyq damýy týraly Óńirlik komýnıkasıalar qyzmetinde ótken baspasóz konferensıasynda Almaty qalasy ákiminiń orynbasary Oljas Smaǵulov málimdedi, dep habarlaıdy aqshamnews.kz
Onyń aıtýynsha, Almaty qarqyndy damý ústinde. Ekonomıkalyq ósimniń negizgi draıverleri retinde qurylys, kólik jáne logıstıka, óńdeý ónerkásibi ataldy. Sonymen qatar, saýda men baılanys qyzmetteriniń kólemi de artyp keledi.
Oljas Smaǵulovtyń aıtýynsha, mundaı nátıjeler joǵary iskerlik belsendiliktiń, ınvestorlar seniminiń artýynyń jáne salyq túsimderiniń turaqtylyǵynyń arqasynda múmkin bolyp otyr.
2025 jyly Almatyda qalanyń jańa ekonomıkalyq ınfraqurylymyn qalyptastyratyn birqatar iri jobalar júzege asyryldy:
• Haval, Chery, Changan markalaryndaǵy kópbrendti avtozaýyt – ınvestısıa kólemi 203 mlrd tg, jyldyq qýattylyǵy 120 myń avtomobıl. 2025 jyldyń shildesinde iske qosyldy;
• «Almaty Museum of Arts» – zamanaýı mádenı ortalyq (aýmaǵy 10 myń sharshy metr, ınvestısıa kólemi 56 mlrd tg), qyrkúıek aıynda ashyldy;
• Open Healthcare KZ medısınalyq ortalyǵy – ınvestısıa 13 mlrd tg, jylyna 9 myń naýqasqa qyzmet kórsetýge eseptelgen, qyrkúıek aıynda ashyldy.
Bul jobalar aıasynda jańa ınfraqurylym qurylyp, 1,5 myńnan astam jańa jumys orny ashyldy.