Qazaqstandyq rejıser Kenjebek Shaıqaqovtyń «Aıqaı» tolyqmetrajdy kórkem fılmi Fransıanyń Vezýl qalasynda ótken 30-shy Halyqaralyq Azıa fılmderi kınofestıvalinde Halyqaralyq Qazylar alqasy taǵaıyndaǵan Gran-prıdi jeńip aldy.
Oǵan qosa, kartına Orta Azıa kınosynshylarynyń «NETPAK» júldesin jáne Mark Haas atyndaǵy arnaıy syılyqty da ıelengen, dep habarlaıdy almaty-akshamy.kz.
Sondaı-aq, fılmde basty rólderdi somdaǵan Orynbek Shaımaǵambetov pen Arnur Akramǵa qazylar alqasynyń arnaıy dıplomy bar.
Osylaısha tórt birdeı júldege ıe bolǵan «Aıqaı» tóreshilerdi tánti qylǵan tańdaýly fılmderdiń biri retinde Vezýl kınofestıvaliniń tarıhynda qaldy.
Aıta keterligi, buǵan deıin Ońtústik Koreıada 4-13 qazan aralyǵynda ótken áıgili Pýsan kınofestıvalinde atalǵan qazaqstandyq kartına A Window on Asian Cinema baǵdarlamasynda kórsetilip, tusaýy kesilgen bolatyn.
Sonymen qatar, «Aıqaı» qarasha aıynda Bishkek Halyqaralyq kınofestıvaline qatysyp, fılmniń rejıseri Kenjebek Shaıqaqov Qazylar alqasy usynǵan «Úzdik senarı» nomınasıasy boıynsha arnaıy júldeni ıelendi.
Esterińizge sala ketsek, Kınokartına QR Mádenıet jáne sport mınıstrliginiń tapsyrysy boıynsha «Ulttyq kınony qoldaý memlekettik ortalyǵy» KEAQ qoldaýymen túsirilgen.
Fılmde kúlli qazaqtyń qasireti bolǵan «Semeı polıgony» qurbandarynyń taǵdyry ıadrolyq jarylystan zardap shegip, qos aıaqsyz dúnıege kelgen azamattyń ómiri arqyly beınelenedi.
Jarynan aıyrylǵan jalǵyzbasty er adam men jarymjan ákesine janashyr, qamqor bola bilgen balanyń kúıbeń tirshiligi arqyly rejıser 1980-90 jyldardaǵy halyqtyń jaǵdaıyn kórsetedi.
Kórkem fılmniń túsirilimi Abaı oblysy, Aıagóz aýdany, Shyńǵoja aýylynda ótken.
Atap óterligi, kartınada basty róldegi Melis atty keıipkerdi kásibı akter emes, rasynda eki aıaǵynan aıyrylǵan qyzylordalyq azamat – Orynbek Shaımaǵanbetov somdaıdy.
Al Melstiń mektep qabyrǵasynda oqıtyn uly – Jalǵastyń rólin Almaty oblysy Qarasaı batyr atyndaǵy mekteptiń 7 synyp oqýshysy Arnur Akram oınaıdy.
Sondaı-aq, qosalqy rólderde belgili akterlar Erbolat Álqojaev, Beınur Baımuhambetov, Erlan Malaev, Aıbek Imanqulov, Aıǵanym Nursultan boı kórsetedi.
Fılmniń túsirilim kezeńi 2022 jyldyń qazan aıynda aıaqtalyp, 2023 jyldyń naýryz aıynda montaj kezeńi bastaldy.
Maýsym aıynyń sońyna deıin sozylǵan montaj kezeńinde fılmniń túsi óńdelip, qaıta dybys jazý, kompúterlik grafıka, dybys árleý jumystary júrgizilgen.
Fılmniń sońǵy nusqasy Memlekettik Ulttyq Kınony qoldaý ortalyǵynyń ekspertti keńes ókilderine 26-maýsym kúni kórsetilip, bekitildi.
Aıta keterligi, fılmniń rejıseri jáne senarı avtory – Kenjebek Shaıqaqov 2014 jyly «Amanat kz» prodúserlik ortalyǵynyń qarjylandyrýymen «DSfilm» kınostýdıasynda debúttik «Kúrkó» atty fılmin túsirdi.
Atalǵan kınokartına sol jyly Dýshanbe qalasynda ótken halyqaralyq «Dıdor» kınofestıvalinde júldeli orynǵa ıe boldy. 2015 jyly Reseıdiń Chıta qalasynda ótken «Baıkal aımaǵy» halyqaralyq kınofestıvalinde «Ádilqazylardyń arnaıy júldesi» nomınasıasymen marapattaldy.
2015 jyly Iakýtskde ótken halyqaralyq kınofestıvalde «Eń úzdik rejıserlik debút» nomınasıasymen marapattaldy.
Sol jyly Almaty qalasynda ótken tuńǵysh qazaqstandyq «Synshylar tańdaýy» kınomarafonynda «Jyldyń úzdik senarıi» júldesin aldy.
Sondaı-aq, sol jyly Avstralıanyń Brısban qalasynda Azıa jáne tynyq muhıty aımaǵy kınoakademıasynyń «ARSA» kınofestıvalinde «Úzdik senarı» nomınasıasy boıynsha qatysty.