Bıyl Keńes áskerleri shekteýli kontıngentiniń Aýǵanstan jerinen shyǵarylǵanyna 35 jyl tolyp otyr. Osyǵan oraı ataýly kún qarsańynda Qazaqstan Respýblıkasy Ulttyq ulany «Ońtústik» óńirlik qolbasshylyǵynyń qolbasshysy general-maıor Talapker Ámireev Aýǵan soǵysynyń ardagerlerin qabyldady.
Olardyń ishinde aýǵan jerinde asa mańyzdy 9 jaýyngerlik operasıaǵa qatysqan, jeke quramyn soǵys is-qımyldarynan esh shyǵynsyz alyp shyqqan jáne táýekelshil áreketteri úshin «Qyzyl juldyz» ordenimen marapattalǵan, İİM jáne Ulttyq ulannyń qurmetti ardageri otstavkadaǵy polkovnık Gennadıı Faleev, Gerat provınsıasyndaǵy qarýly kóterilisti basý kezinde barlaý málimetterin jınaý boıynsha jaýyngerlik mindetterdi atqarǵan, «Jaýyngerlik eńbegi úshin» medaliniń ıegeri otstavkadaǵy aǵa leıtenant Egizbaı Baıtursynov, aýǵan jerinde bir jarym jylǵa jýyq qyzmet etip, erlik úlgilerin kórsetken, jeke quram ishinde erekshe abyroıǵa ıe bolǵan, «Aýǵan halqynyń ınternasıonalıs jaýyngerge alǵysy» medalimen marapattalǵan, İİM jáne Ulttyq ulannyń qurmetti ardageri, kúreń beret ıesi otstavkadaǵy maıor Pavel Semenúk, túrli jaýyngerlik is-qımyldardy sapaly baılanyspen qamtamasyz etken, Aýǵanstannyń qaterli jolymen 18 ret avtomobıl legin alyp júrgen jaýjúrek jaýynger «Jaýyngerlik eńbegi úshin», «Aýǵan halqynyń ınternasıonalıs jaýyngerge alǵysy» medaldarynyń ıegerleri otstavkadaǵy maıor Vıktor Lınok jáne Kabýl qalasyndaǵy Keńes áskerleri qatarynda bir jyl úsh aı qyzmet atqarǵan, «Jaýyngerlik eńbegi úshin» medaliniń ıegeri zapastaǵy medısına qyzmetiniń polkovnıgi Qalybek Buralhıev bar.
Qolbasshy ardager jaýyngerlerdi jyly qabyldap, ataýly kúnmen quttyqtady. Olardyń jeke quramdy tárbıeleý isine qosar úlesteriniń zor ekendigine basa nazar aýdaryp, aldaǵy ýaqytta da birlesip qyzmet ete beretindikterine tilek bildirdi. Ardagerlerimizge estelik syılyqtar usynyldy.
Aıta keteıik, Aýǵan soǵysyna KSRO elderimen qatar Qazaqstannan 22 myń adam qatysyp, olardyń 761 qaza tapqan, 21 habarsyz ketken.