Dıdar Amantaıdyń jańa kitaby jaryq kórdi
Almatyda jazýshy Dıdar Amantaıdyń Ult ustazy Ahmet Baıtursynulynyń til muratyn, fılosofıalyq bolmysyn taldaǵan roman-essesi jaryq kórdi.
Mádenıet basqarmasyna qarasty «Almaty qalasy mýzeıler birlestigi» KMQK qoldaýymen jaryq kórgen jazýshy Dıdar Amantaıdyń «Ahmet Baıtursynuly: til muraty, bolmys fılosofıasy» atty kitabynyń tusaýkeseri Ahmet Baıtursynuly mýzeı-úıinde ótti.
Sharaǵa Ahmet Baıtursynuly «Til – qural» OÁǴZO-nyń, Almaty qalasy Mýzeıler birlestiginiń ókilderi jáne «Ahmet Baıtursynuly mýzeı-úıi» qyzmetkerleri, stýdentter, Abaı atyndaǵy mekteptiń jas jetkinshekteri qatysty.
Fılosof jazýshy, kınodramatýrg D.Amantaıdyń atalmysh eńbegi buǵan deıin A.Baıtursynuly týrasyndaǵy zertteý eńbekterinen aıryqsha. Kezekti kitabynda avtor Ult ustazynyń muralarynan týyndaıtyn fılosofıalyq tujyrymdardy alǵa tartady. Sondaı-aq onyń aǵartýshylyq jáne áleýmettik taqyrypta jazylǵan eńbekterin taldaıdy.
Avtordyń bul eńbegi ahmettanýda tyń kózqarastarǵa toly bolýymen erekshelengen. Qazaq ádebıettaný ǵylymynyń negizin qalaýshy ári aǵartýshynyń tulǵalyq qabiletine jańa qyrynan úńilgen. Jańa eńbek A.Baıtursynulynyń bolmys fılosofıasyna úńilgen alǵashqy eńbek deýge bolady.
Sharada «Ahmet Baıtursynuly mýzeı-úıiniń» jetekshisi Raıhan Imahanbet Dıdar Amantaıǵa asa baǵaly eńbegi úshin rızashylyǵyn bildirdi.