Abý-Dabıde Azıa shahmat federasıasynyń samıti ótip jatyr (ACF). Búgingi tańda ACF quramyna 54 eldiń shahmat federasıasy kiredi, onyń ishinde Qazaqstan shahmat federasıasy da bar.
Samıtte federasıanyń birinshi vıse-prezıdenti Dármen Sádýaqasov Qazaqstanda shahmatty damytý Tujyrymdamasyn tanystyryp, atalǵan saladaǵy jetistikteri jáne josparlarymen bólisti. Forým aıasynda QHR, Úndistan, Ortalyq Azıa elderi federasıalarynyń basshylyǵymen sheıh Sultan bın Halıfa Ál Nahánmen kezdesýler ótkizildi.
Saılaýda Azıa shahmat federasıasynyń keńesimen ACF vıse-prezıdenti bolyp Dármen Sádýaqasov taǵaıyndaldy.
«Sońǵy ýaqytta bizdiń shahmatshylar óte jaqsy nátıje kórsetýde, bizde balalar men jasóspirimder, qyzdar quramasy óte myqty. Qazaqstanda iri chempıonattar ótkizile bastady. Osy sátti paıdalana otyryp, Freedom Finance Global jáne bizdiń federasıa prezıdenti Tımýr Týrlovqa jahandyq shahmat týrnırlerin uıymdastyrý múmkindigi úshin alǵys bildirgim keledi. Atalǵan sharalar Qazaqstanda balalar shahmatynyń damýyna úlken serpin berip, bul oıyndy óskeleń urpaq arasynda keńinen nasıhattaıdy. Meniń Azıa Federasıasyna vıse-prezıdent retinde taǵaıyndalýym - elimizdegi shahmattyń damýyn, halyqaralyq deńgeıdegi tabystarymyzdy jáne Qazaqstan federasıasynyń planetarlyq aýqymdaǵy chempıonattardy uıymdastyrýdaǵy róliniń moıyndalǵanyn kórsetedi», - dep atap ótti Qazaqstan shahmat federasıasynyń birinshi vıse-prezıdenti Dármen Sádýaqasov.