Almatyda Turǵut Ózal kóshesinen Muqanov kóshesine deıingi uzyndyǵy 2,6 km, jalpy aýmaǵy 5,2 gektar bolatyn bólingen jolaqta abattandyrý jumystary aıaqtaldy. Sońǵy ret bul jerde jóndeý 15 jyl buryn júrgizilgen edi.
Esterińizge sala keteıik, bıyl mamyrda Almaty ákimi Erbolat Dosaev kóriktendirý jobasymen tanysyp, onyń tapsyrmasyna sáıkes jańǵyrtý barysynda sapaly materıaldar qoldanyldy. Jol men jaıaý júrginshilerge arnalǵan aımaqtardy jaıly etý maqsatynda yńǵaıly oryndyqtar, fýnksıonaldy shamdar jáne berik jabyn tóseldi.
Bul «Halyq qatysatyn búdjet» baǵdarlamasynyń jobasy turǵyndardyń bastamasy men bıliktiń qoldaýy arqyly qalany qalaı ózgertýge bolatynyn, ony barlyq turǵyndarǵa tartymdy ári jaıly ete alatynyn kórsetti.
– Árqaısymyz «Halyq qatysatyn búdjet» baǵdarlamasyna qatysý týraly oılanýymyz kerek. Bul qalany kórkeıtýge úles qosýdyń tamasha múmkindigi. Osyndaı jobalardyń arqasynda turǵyndardyń ıdeıasy shyndyqqa aınalyp jatqanyn kórip otyrmyz, – dep jobanyń mańyzdylyǵyn atap ótken sáýletshi Vladıslav Fılatov azamattardyń mundaı jobaǵa atsalysýy sapaly qalalyq ortany qalyptastyrýǵa yqpal etetinin jetkizdi.
Kóriktendirý aıasynda 7810 m² jańa kespe tas tóselip, 4882 metr jıektas ornatyldy, bul aleıanyń kórkin keltirip, jaıaý júrginshiler úshin yńǵaıly etti. Uzyndyǵy 10 800 metr bolatyn sý qubyry jasyl jelekti sýarýǵa arnalǵan. 21 000 m² aýmaqta kógal egilip, 2500 buta otyrǵyzyldy, 110 qoqys jáshigi jáne 150 jaryqtandyrý baǵanasy ornatyldy, bul qaýipsizdik pen jaılylyqty arttyrady.
– Qala turǵyndary men qonaqtaryna yńǵaıly bolý úshin túrli demalys aımaqtary qarastyrylǵan: aleıa boıyna ornatylǵan átkenshekter stýdentter men zeınetkerlerge taza aýada demalýǵa múmkindik beredi. Sondaı-aq, munda alty pergola, on jartylaı sheńberli oryndyq, úsh baqbaq pishinindegi oryndyq, eki altybaqan, segiz bir jaqty jáne 75 jalǵyz oryndyq ornatylǵan, bul qala turǵyndaryna jaıly demalys oryndaryn qurýǵa múmkindik beredi, – dedi Vladıslav Fılatov.
Almatylyqtar barsha urpaqtyń qajettiligine saı keletin jańa keńistikti joǵary baǵalady.
– Aleıanyń osylaısha ózgergenine qýanyshtymyz, – deıdi turǵyn Serik Erjanov. – Munda serýendep qana qoımaı, sportpen de aınalysýǵa bolady, jaqsy jaryqtyń arqasynda kez kelgen ýaqytta demalýǵa múmkindik bar. Yńǵaıly oryndyqtar men átkenshekter aleıany erekshe jaıly etip, stýdentterden bastap zeınetkerlerge deıin bárimizdi qýantady. Qala ár adamǵa odan da qaıyrymdy ári jaıly bola tústi.
Basqa turǵyndar da jańartýlardyń mańyzdylyǵyn atap ótti.
– Ana retinde balalarmen qaýipsiz ári kórikti jerde demalýdyń mańyzy zor, – deıdi qala turǵyny Aıjan Qasymova. – Biz munda otbasymyzben jıi kelemiz, endi balalar oınap jatqanda ýaqytty tıimdi ótkizýge múmkindik bar. Qalada árkimge arnalǵan demalys oryndary kóbeıip jatqanyna qýanyshtymyz. Almaty ákimdigine alǵysym sheksiz.
Tipti, eń jas turǵyndar da jańa aleıaǵa joǵary baǵa berdi:
– Men jaqyn jerde turamyn, dostarymmen osynda kelip oınaı alatynymyzǵa qýanyshtymyn. Aleıa óte ádemi boldy. Munda átkenshek tepkendi jaqsy kóremin, – dedi Aıdar Sanjar.
Osylaısha, kóriktendirý jumystarynyń nátıjesinde jańartylǵan aleıa qalanyń fýnksıonaldy jáne estetıkalyq bóligine aınaldy. «Halyq qatysatyn búdjet» baǵdarlamasy taǵy da qala turǵyndarynyń ıdeıasy júzege asyp, belsendi ómir salty men demalysqa arnalǵan sapaly qoǵamdyq keńistikter qurýǵa yqpal etetinin dáleldedi.