Qyzylordalyq Nurlybek Baımenovtiń bir qoly osydan 20 jyl buryn poıyz astynda qalyp, julynyp, sonadaıǵa ushyp ketken. Aýrýhana tóseginde jatyp «endi qalaı kún kóremin, jumysqa kim alady meni, otbasyn qalaı quramyn» dep jylaǵanyn jasyrmaıdy.
Joǵary bilim almaǵan, mektepten 9-synyptan keıin shyǵyp ketken. Ómirinde kóp qıyndyq kórgen. «Myna túrińmen seni eshkim jumysqa almaıdy» dep muqatqandar da az bolmaǵan. Kúndelikti nápaqasyn tabý úshin sholaq qolymen júrip-aq aldynan kezikken barlyq qara jumysty istegen. Úılený týraly múldem oılamaıtyn. Sebebi, «maǵan kim kúıeýge shyǵa qoıar deısiń» dep, bul taqyrypty múldem jaýyp qoıǵan sátteri bolǵan. Bala kúninen buzyq bolǵanyn da jasyrmaıdy.
Jergilikti bir TJO-ǵa jumysqa kirip, kólikterdiń qorabyn bir qolymen-aq sheship alyp, ıyǵyna salyp alyp ketip bara jatqan sátin kórgender tańqalýshy edi. Ol jumysyn jaqsy kórdi, sodan bereke tapty. Birde temir-tulparlardyń «ishek-qarnyn» aqtaryp tastap, qaıta qurastyratyn basshysynyń ábjil qımyldaryna, is-áreketterine kóz salyp júrip, ony da meńgerip alady.
Búginde óziniń tehnıka jóndeý ortalyǵy bar. Iá, nesıe alyp ashqan. Joqtan bar jasap júrgen azamat birneshe jigitti jumyspen qamtyp otyr. Jumysyndaǵy qyzyqty sátterdi Instagram, TikTok jelilerine salyp, kópshilikti, ásirese, jastardy adal eńbek etýge, qıyndyqtan qashpaýǵa úndep otyratyny da bar. Nurlybektiń sholaq qolymen-aq avtokóliktiń aýyr qorabyn bir ıyǵyna salyp alyp, óz betinshe tirshilik etip jatqanyn kórgen almatylyq Shalqar esimdi azamat jýyrda oǵan quny kóp aqsha turatyn, kólikterdi jóndeýge arnalǵan qural-jabdyqtar syılady. Qýanyshyn jasyra almaǵan Nurlybek Baımenov jańalyǵyn áleýmettik jelide bólisip, oqyrmandarynan súıinshi surady. Shalqar zamandasyna alǵysyn bildirdi.
Aıtpaqshy, Nurlybek Baımenov úılengen, eki balasy bar. Kelinshegi: «Ekeýmizdiń ursysqan kezimiz esimde joq. Bir nársege kóńili tolmaı qalsa, atymdy atamaı, maǵan qaraı «áý, Erjanova» dep famılıamdy zilsiz atap jaqyndap kele jatqannan-aq «Senimen ursysý da múmkin emes» dep kúlip jiberetinim bar», – deıdi. Mundaı jandardyń ómiri bizge úlgi bolýy tıis.