Jalpy, jemqorlyq derekteri jıi kezdesedi degen alty sala belgilengen
Almaty qalasy ákiminiń orynbasary Álisher Ábdiqadyrovtyń tóraǵalyǵymen Sybaılas jemqorlyqqa qarsy is-qımyl máseleleri jónindegi qalalyq komısıanyń kezekten tys keńeıtilgen otyrysy ótti. Otyrysqa aýdan ákimderi, memlekettik jáne quqyq qorǵaý organdarynyń, kvazımemlekettik sektordyń basshylary, qoǵam ókilderi qatysty, dep habarlaıdy Almaty-akshamy.kz.
Jıynda sóz alǵan Álisher Ábdiqadyrov sybaılas jemqorlyqqa ýaqytyly jáne úılestirilgen áreketpen ǵana tıimdi qarsy turýǵa bolatynyn atap ótti.
«Memleket basshysy bekitken Qazaqstan Respýblıkasynyń Sybaılas jemqorlyqqa qarsy saıasatynyń tujyrymdamasyn iske asyrý aıasynda Almaty turǵyndarynyń áleýmettik mańyzdy máselelerin sheshýde kúsh-jigerdi biriktirý qajet. Sonymen qatar, memlekettik organdardyń basshylary sybaılas jemqorlyqqa qarsy saıasat tujyrymdamasyn iske asyrý jónindegi josparynda belgilengen is-sharalardyń tıimdiligi men oryndalý sapasyn basymdyqpen aıqyndaýy qajet», - dedi qala ákiminiń orynbasary Álisher Ábdiqadyrov.
Óz sózinde Qazaqstan Respýblıkasy Sybaılas jemqorlyqqa qarsy is-qımyl agenttigi tóraǵasynyń birinshi orynbasary Dmıtrıı Malahov Sybaılas jemqorlyq táýekelderiniń kartasy ázirlengenin, oǵan elimizdiń árbir óńiriniń eń ózekti máseleleri engizilgenin atady. Kartada ákimshilik kedergilerdiń bolýyna, zańnamanyń jetilmegendigine, sybaılas jemqorlyq táýekelderine baılanysty sheshimi tabylmaǵan máselelerdiń tizbesi kórsetilgen.
Almaty qalasy boıynsha sybaılas jemqorlyq táýekelderine neǵurlym beıim 6 baǵyt anyqtaldy, olar - qurylys, ekologıa, fıskaldyq sala, áleýmettik sala, ekonomıka jáne qarjy.
Almaty qalasy ákiminiń orynbasary aıtqandaı, búginde Almaty qalasy ákimdiginde Sybaılas jemqorlyq táýekelderine ishki taldaý júrgizilip jatyr, ákimshilik kedergilerdi joıý, ashyqtyq pen jarıalylyqty qamtamasyz etý úshin bilim berý, densaýlyq saqtaý, kólik, jer qatynastary salasyndaǵy jumys ońtaılandyryldy, memlekettik qyzmet elektrondyq formatqa aýystyryldy, memlekettik apparattyń qoǵammen syndarly dıalogy quryldy.