Avtokóliktiń memlekettik tirkeý nómiri belgisine onyń túpnusqalyǵyn tekserýge múmkindik beretin biregeı DMC kod salynady, dep habarlaıdy Almaty-akshamy.kz QazAqparatqa silteme jasap.
QR ST 986-2022 standarty 1 qyrkúıekten bastap qoldanysqa engizildi. Onda burmalaýdan (qoldan jasaýdan) qorǵaý úshin nómir belgilerinde arnaıy jáne qosymsha elementter bolýy tıistigi týraly talaptar jazylǵan.
«Standart memlekettik tirkeý nómiri belgilerindegi qaripterge, sandarǵa jáne qorǵanys elementterine qoıylatyn tehnıkalyq talaptardy birizdendirýdi qamtamasyz etedi.
Qosymsha qorǵanys elementterine polısıa qyzmetkerleri memlekettik nómirlerdiń túpnusqalyǵyn teksere alatyn biregeı DMC kod salý da jatqyzyldy.
Arnaıy qorǵanys elementterin nómir belgisiniń betinen hımıalyq quraldarmen nemese fızıkalyq jolmen alyp tastaý múmkin emes jáne nómir belgisiniń búkil paıdalaný merzimi ishinde saqtalýy tıis», - delingen baspasóz málimdemesinde.
Vedomstvo málimetinshe, jańa standarttyń qoldanysqa engizilýi avtokóliktiń memlekettik tirkeý nómiri belgisin daıyndaý baǵasyna áser etpeıdi, sondaı-aq búdjetten qosymsha shyǵyn bolmaıdy.
Standartty İshki ister mınıstrliginiń «Aqparattyq-óndiristik ortalyq» RMK-si ázirlep, Caýda jáne ıntegrasıa mınıstrligi Tehnıkalyq retteý jáne metrologıa komıtetine qarasty QazStandartta saraptamadan ótken.