Arnaıy kezdesýler 60-tan astam qalada ótedi.
«Samuryq-Qazyna» qory Qazaqstannyń barlyq óńirlerinde IPO taqyrybynda turǵyndarmen aqparattyq-túsindirý kezdesýlerin bastaıdy, dep habarlaıdy Almaty-akshamy.kz.
Halyqpen, kásiporyn jumyskerlerimen jáne qoǵam qaıratkerlerimen kezdesýler búkil el boıynsha 60-tan astam qalada ótedi. İs-sharalarǵa «Samuryq-Qazyna» AQ, «QazMunaıGaz» UK» AQ, «Qazposhta» AQ, AIX jáne KASE qazaqstandyq qor bırjalarynyń jáne brokerlik-dılerlik uıymdardyń ókilderi qatysady.
Sarapshylar qoǵamdy Qordyń jekeshelendirý baǵdarlamasynyń jáne portfeldik kompanıalardyń IPO-nyń iske asyrylý barysymen, onyń ishinde birinshi IPO-kandıdaty – «QazMunaıGaz» UK» AQ kompanıasyna qatysty negizgi aqparatpen tanystyrady.
«Samuryq-Qazyna» AQ maqsattarynyń biri - barlyq qazaqstandyqtardyń IPO-ǵa qatysýyn qoljetimdi etý. Úkimettik Jekeshelendirý josparyn iske asyrý sheńberinde, Qor Qazaqstan Respýblıkasynyń azamattaryna óz aktıvterin básekeles ortaǵa shyǵarý tetikteri jáne eldiń iri kompanıalarynyń IPO-ǵa qatysý múmkindikteri týraly tolyq aýqymdy aqparat taratýdy jalǵastyrady.
IPO jáne Qordyń jekeshelendirý baǵdarlamasy týraly kóbirek bilińiz.
Anyqtama úshin:
2025 jylǵa deıin «Samuryq-Qazyna» AQ-nyń 8 iri aktıvi, onyń ishinde IPO arqyly básekeles ortaǵa ishinara shyǵarylady. «QazMunaıGaz» UK» AQ IPO-sy osy jylǵa josparlanǵan. Esterińizge sala keteıik, 2012-2020 jyldar aralyǵynda Qordyń birneshe iri kompanıalary qazaqstandyq qor alańdarynda aksıalardyń lıstıńin ótkizdi. «Samuryq-Qazyna» portfeldik kompanıalarynyń IPO-nyń tabystylyǵy tólengen dıvıdendterdiń kólemimen jáne kompanıalardyń lıstıńi bastalǵannan bastap olardyń naryqtyq kapıtaldandyrýynyń ulǵaıýymen rastalady. Máselen, KazTransOil kompanıasynda aksıalar qunynyń ósimi 121%-dy, KEGOC - 281%-dy, Kazatomprom – 383%-dy qurady.