Eýrazıalyq ekonomıkalyq odaq elderinen byltyrǵy jyldyń 1 qyrkúıegine deıin ákelingen kólikterdi ýaqytsha tirkeý merzimi uzartyldy, dep habarlaıdy almaty-akshamy.kz
Sondaı-aq, buryn zańdastyrýǵa qujaty tapsyrylǵanymen, ótinishi keri qaıtarylǵan kólikter de osy múmkindikti paıdalana alady. Búginge deıin 9 myńnan astam temir tulpar ýaqytsha tirkeýge alyndy.
Ózgeris Eýrazıalyq ekonomıkalyq odaq elderinen byltyr 1 qyrkúıekke deıin ákelingen kólikterge qatysty. Bes jylǵa deıin ýaqytsha tirkeýge bolady. Mamandardyń aıtýynsha, tirkeý merzimin uzartýdyń birneshe sebebi bar. Keıde kóliktiń ıesin tabý múmkin emes, keıde qarjylyq uıymda kepilde turady. Másele túrli deńgeıde birneshe márte kóterildi.
1 shildege deıin zańdastyrýǵa qujaty tapsyrylǵanymen, zańdastyrylmaǵan kólikter de ýaqytsha tirkeýge qoıylady. Qazaqstandaǵy qojaıyny osy merzimde qujatyn retteýi tıis. Bul ýaqytta kólik shekaradan aspaıdy. Eger, másele sheshilmese, bes jyldan keıin el aýmaǵynan shyǵarylady.
Tirkelgen kólikterdiń basym bóligi Reseı men Armenıadan ákelingen. Sondaı-aq, búginde byltyrǵy 1 qyrkúıekten keıin jetkizilgen kólikterge de qatysty másele týyndap jatyr.
Mamandardyń sózine súıensek, 1 qyrkúıekten beri el aýmaǵyna engen kólikterdiń barlyǵy qosalqy bólshek retinde kirgizilgen. Ol kólikter «avtokonstrýktor» retinde tirkeýge qoıylady. Biraq, el aýmaǵynan shyǵýǵa nemese basqa adamǵa satýǵa ruqsat joq.