Aldaǵy ýaqytta Qazaqstannyń kólik-áleýmettik áleýetin damytý maqsatynda Qaýipsizdik Keńesiniń arnaıy otyrys ótpek
QR Prezıdenti janyndaǵy QR UǴA akademıgi Baǵdat Teltaev Ulttyq quryltaıdyń IV otyrysy týraly pikir bildirip, Memleket basshysynyń eldiń kólik-tranzıttik áleýetin kóterý arqyly ekonomıkany damytýǵa bolady degen usynysyn qoldaıtynyn jetkizdi, dep habarlaıdy aqshamnews.kz.
«Ulttyq quryltaıda Memleket basshysy «Ár eldiń damýynyń negizi ekonomıka bolsa, sol ekonomıkanyń negizi – salyq» degendi aıtty. Iaǵnı, elimizde qazirgi kezde salyq júıesindegi ózgerister engizý máselesin kóterdi. Muny halyq jaqsy túsinip otyr, sondyqtan aldaǵy ýaqytta halyqqa da, ekonomıkanyń damýyna da ońtaıly sheshim qabyldaımyz dep oılaımyn.
Prezıdent óz sózinde ınfraqurylym máselesine de toqtalyp ótti. Eki aı buryn, ıaǵnı bıylǵy 28 qańtarda Memleket basshysy Úkimettiń keńestilgen otyrysynda úlken tapsyrmalar berdi. Sonyń ishinde ınfraqurylym men kólik logıstıka salasyna kóp kóńil bólýdi atap ótken bolatyn. Bul joly da Prezıdent Qazaqstan úshin 4 iri salany nysanaǵa alyp, sony el bolashaǵy úshin damytý týraly aıtty. Sonyń ishinde kólik tasymalyna nazar aýdardy. Osyǵan qatysty aıtar bolsaq, aldaǵy ýaqytta 9 avtokólik beketin jańartý josparlanyp otyr. Sonyń negizinde avtokólik ótetin tranzıttik joldardyń áleýeti artpaq», - dedi Baǵdat Teltaev.
Jalpy, Úkimettiń keńeıtilgen otyrysynda Memleket basshysy «álemdik saýdada kólik-logıstıka máselesi birinshi oryndy alyp tur» dep aıtqan bolatyn. Akademıktiń aıtýynsha, Eýrazıa qurlyǵynda ońtaıly ornalasqan Qazaqstan úshin muny tipti «altyn balyq» deýge de bolady. Sondyqtan biz osy artyqshylyǵymyzdy el ıgiligi úshin durys paıdalana bilýimiz kerek. Iaǵnı, búdjetti tek munaı, metal satyp toltyryp otyrmaı, ózimizdiń kóliktik dálizderimizdi sapaly etip salyp, kútip-baptap, ózge elderdiń kólikterin ótkizý arqyly paıda taýyp, el ekonomıkasyn áldeqaıda kóterip alý múmkindigi baryn Memlekte basshysy jaqsy túsinip otyr. Ony basqa mamandar da, halyq ta jaqsy túsinip kele jatyr.
«Prezıdent Úkimettiń keńeıtilgen otyrysynda «Qazaqstannyń kólik-áleýmettik áleýetin damytý maqsatynda Qaýipsizdik Keńesiniń arnaıy májilisin arnaımyn» degen edi jáne aldyn ala mamyr aıyndda bolady degen usynys tastady. Egemen Qazaqstan tarıhynda mundaı mańyzdy jaıt, ıaǵnı ekonomıkanyń bir salasyn jarıa túrde Qaýipsizdik Keńesiniń arnaıy otyrysynda talqylaý buryn-sońdy bolmaǵan. Sondyqtan bul da elimiz úshin kólik tranzıti áleýetiniń óte mańyzdy ekenin bildirse kerek. Sondyqtan osy máseleni biz de tereń ári jan-jaqsy zerttep, óz usynystarymyzdy, aqyl-keńesimizdi berýimiz kerek.
Máselen, Prezıdent janyndaǵy QR UǴA kólik seksıasy qazir usynys daıyndap jatyr. Alda ótetin Qaýipsizdik Keńesiniń otyrysynda qandaı máselelerge kóńil bólgen abzal. Biz de óz tarapymyzdan qandaı sheshimder Qazaqstannyń kólik-tranzıttik áleýetin arttyrady jáne elimizge paıdaly bolady degen maqsatpen tıisti usynystar daıyndar jatyrmyz», - dedi B. Teltaev.