Bir aptada keı óńirlerde jaýyn-shashyn mólsheri eki aılyq normadan asyp túsken.
1 qańtardan bastap búginge deıin aýa raıynyń kúrt nasharlaýyna baılanysty respýblıkalyq mańyzy bar avtojoldarda qozǵalys 126 ret shekteldi, dep habarlaıdy Almaty-akshamy.kz QazAvtoJol baspasóz qyzmetine silteme jasap.
Jol qyzmetteri qubylmaly aýa raıy saldarymen kúresip, tasjoldardy jaýǵan qardan úzdiksiz, kúsheıtilgen rejımde tazartyp jatyr.
Abaı jáne Shyǵys Qazaqstan óńirlerinde tórt táýlik boıy kún raıy ashylmaı tur. Osyǵan baılanysty bul óńirlerdegi tasjoldarda jaǵdaı áli de kúrdeli.
«Qazgıdromet» RMK aqparatyna sáıkes, bul óńirlerde bir aptaǵa jetpes ýaqyt ishinde jaýyn - shashyn mólsheri eki aılyq normadan asyp túsken. Eger norma mólsheri 11-31 mıllımetr bolsa, bul óńirlerde 77 mıllımetrge deıin jaýyn-shashyn jaýǵan. Jolshylar eki metrge jýyq qardy tazalaýda.
Bir jeti ishinde Abaı jáne Shyǵys Qazaqstan óńirlerinde qar qursaýynan arnaıy tehnıka kómegimen 1 myńnan astam kólik shyǵaryldy.
Osy ýaqyt aralyǵynda jolshy mamandar respýblıkalyq mańyzdaǵy kúre joldar jelisine 7 myń tekshe metr kóktaıǵaqqa qarsy materıaldardy septi.
1403 baılanys ortalyǵynyń mamandary da kúsheıtilgen rejımde qyzmet atqarýda. Sońǵy jeti kúnde operatorlar jol paıdalanýshylarynan kelgen 30 myńǵa jýyq qońyraýdy óńdedi.
Respýblıkalyq mańyzy bar avtomobıl joldaryn qardan tazartý jumystary jalǵasa bermek. Qysqy kútip ustaý jumystaryna 600 birlik arnaıy tehnıka jumyldyryldy.