Búgingi tańda 6, 7 jáne odan da kóp balany dúnıege ákelip, tárbıelegen analar birdeı kólemde járdemaqy alady.
1 shildeden bastap respýblıkalyq búdjetten «Altyn alqa» alǵan, «Batyr ana» ataǵy bar, ıaǵnı 7 jáne odan da kóp bala týyp, tárbıelegen I jáne II dárejeli «Ana dańqy» ordenimen marapattalǵan analarǵa tólenetin járdemaqy 7,4 AEK-ke deıin (2023 jyly – 25 530 teńge) ósedi. Tıisti norma QR Áleýmettik kodeksinde kózdelgen, dep habarlaıdy Almaty-akshamy.kz QazAqparatqa silteme jasap.
Eńbek jáne halyqty áleýmettik qorǵaý mınıstrligi ázirlegen jáne Memleket basshysy qol qoıǵan QR Áleýmettik kodeksi 9 zańdy shoǵyrlandyrdy jáne áleýmettik qamsyzdandyrý júıesin damytýdyń quqyqtyq negizderin nyǵaıtýǵa ári azamattardy áleýmettik qoldaý sharalarynyń ataýlylyǵyn kúsheıtýge baǵyttalǵan.
QR Áleýmettik kodeksin iske asyrý áleýmettik qamsyzdandyrý júıesin kezeń-kezeńimen halyqaralyq standarttar deńgeıine keltirýge, halyqtyń, memlekettiń jáne jumys berýshilerdiń áleýmettik táýekelderdiń saldary úshin ortaq jaýapkershiliginiń rólin kúsheıtýge, azamattardyń proaktıvti format arqyly memlekettik qoldaý sharalaryna teń qoljetimdiligin qamtamasyz etýge, sondaı-aq jumyspen qamtýǵa járdemdesýdiń belsendi sharalarynyń ashyqtyǵy men ataýlylyǵyn arttyrýǵa múmkindik beredi.
Qujattyń jańashyldyǵynyń biri – «Nagradtalǵan ana» degen jańa uǵymdy engizý bolatyn.
Bul mártebe «Kúmis alqa», «Altyn alqa» alqalarymen marapattalǵan nemese buryn «Batyr Ana» ataǵyn alǵan, I jáne II dárejeli «Ana dańqy» ordenderimen marapattalǵan áıelderge beriledi.
QR Áleýmettik kodeksinde nagradtalǵan analarǵa tólenetin járdemaqy mólsherin saralaý kózdeledi.
Máselen, «Altyn alqamen», I jáne II dárejeli «Ana dańqy» ordenderimen marapattalǵan,
«Batyr ana» ataǵy bar, ıaǵnı 7 jáne odan da kóp bala týyp, tárbıelegen analarǵa arnalǵan járdemaqy mólsheri 2023 jylǵy 1 shildeden bastap 7,4 AEK-ke deıin (2023 jyly – 25 530 teńge) ósedi.
Bul ózgeris 90 myńǵa jýyq marapattalǵan analardy qamtıtyn bolady.
Járdemaqy alýshylarǵa 2023 jylǵy 1 shildedegi jaǵdaı boıynsha onyń mólsherin arttyrý memlekettik organdardyń aqparattyq júıelerinde bar málimetter negizinde avtomatty túrde júzege asatynyn atap ótý qajet.