Túıtkildi máseleni ońtaıly sheshý
QR Indýstrıa jáne ınfraqurylymdyq damý mınıstrligi men QR Energetıka mınıstrligi kúzgi avıajanarmaı defısıtiniń aldyn alý sharalaryn júrgizýde, dep habarlaıdy Almaty-akshamy.kz QazAqparat-qa silteme jasap.
Jyl saıyn otandyq azamattyq avıasıa salasy munaı óńdeý zaýyttarynda júrgiziletin maýsymdyq josparly jóndeý jumystaryna baılanysty jáne osyǵan oraı avıasıaǵa arnalǵan janar-jaǵarmaı óndirýdi ýaqytsha shekteýge baılanysty avıakerosın tapshylyǵyna tap bolady.
Túıtkildi máseleni ońtaıly sheshý maqsatynda byltyrǵy jyldyń sońyna qaraı QR IIDM Energetıka mınıstrligimen birlesip arnaıy jıyn ótkizdi. Basqosýǵa iri avıajanarmaı jetkizýshiler, otandyq áýekompanıalar men áýejaılar basshylary, QTJ jáne QMG syndy irgeli ulttyq kompanıalardyń ókilderi qatysty. Nátıjesinde taraptar janarmaı jetkizýdegi máselelerdi nazarǵa alyp, ózara kelisimge keldi. Atap aıtqanda, eń birinshiden, avıajanarmaı jolaýshylar tasymalymen aınalysatyn otandyq avıakompanıalarǵa jetkizilýi tıis. Sodan keıin ǵana sheteldik áýe kompanıalary men júk tasymaldaýshylarǵa berilýi qajet.
Janarmaıdy bulaı jetkizý sqemasy munaı ónimderi resýrsyn saqtaýshylar úshin mindetti bolyp tabylmaıdy. Bul tásil ishki jáne halyqaralyq jolaýshylar tasymalyn úzilissiz oryndaýdy qamtamasyz etýge baǵyttalǵan.
Qazirgi ýaqytta yntaly eki mınıstrlik avıajanarmaıdy deldaldarsyz jetkizýdi shekteý maqsatyndaǵy qosymsha sharalardy pysyqtaýda. Onyń ishinde:
- avıajanarmaıdy taýar bırjalary arqyly jetkizýdi 100 paıyzǵa jetkizý (bul tásil azamattyq avıasıa sýbektilerine arnalǵan janarmaıdy resýrs saqtaýshylarynan tikeleı jetkizý prosesiniń ashyqtyǵyn qamtamasyz etedi);
- «QazMunaıGaz-Aero» arqyly biriktirilgen ımporttyq janarmaı satyp alý (kepildendirilgen kólemdegi janarmaı men ımporttyq avıajanarmaıdyń edáýir kólemi esebinen janarmaı baǵasyn tómendetý maqsatynda).
Jalpy alǵanda, avıajanarmaı tapshylyǵyn joıý, ishki naryqty tolyǵymen qamtý jáne ımporttyq ónimderdi azaıtý úshin otandyq munaı óńdeý zaýyttarynyń jyldyq ónim óndirý qýattylyǵyn arttyrý qajet ekendigi belgili. Bul ásirese, pandemıadan keıingi jolaýshylar tasymalynyń artýyna oraı jáne tranzıttik ushaqtardyń tehnıkalyq qonýlar qarqynynyń ósýine baılanysty ózekti bolyp otyr.
Osy oraıda aıta keterligi, 2021 jyly 670 myń tonna avıajanarmaı jumsalǵan. Al óndirilgen ónim kólemi - 580 myń tonna. 2022 jyldyń alǵashqy 7 aıynda tutynylǵan avıajanarmaı kólemi 455 myń tonnany quraıdy. Al óndirilgen ónim mólsheri - 399 myń tonna. Boljam boıynsha bıyl 1 mln tonna janarmaı tutynylmaq. Al 2022 jyly kútilip otyrǵan avıajanarmaı óndirisiniń kólemi 700 myń tonna shamasynda.