Oqýshylardyń aýyr rúkzaktaryn planshetter aýystyrady.
Bul týraly búgin Úkimet otyrysynda Sıfrlyq damý, ınovasıalar jáne aeroǵarysh ónerkásibi mınıstri Baǵdat Mýsın málimdedi, dep habarlaıdy BAQ.KZ tilshisi.
«Áriptesim Asqat Qanatuly usynǵandaı, «aýyr rúkzaktar» men mektepterdegi sıfrlandyrý deńgeıin arttyrý máseleleri planshet qoldaný arqyly keshendi sheshimin tabýy múmkin. Planshetter sıfrlyq oqýlyq retinde nemese úıden onlaın bilim alý quraly retinde qoldanýǵa oń áserin tıgizedi. Kórip otyrǵandaı, mundaı ádis birqatar damyǵan elde, onyń ishinde Ulybrıtanıa, Norvegıa, Ońtústik Koreıa jáne Túrkıanyń mektepterinde jaqsy nátıjege ákeldi. Buǵan qosa, oqýshylar úshin shyǵarmashylyq pánder boıynsha óz kontentin jasaýǵa múmkindik beredi. Atalǵan elderde osy sheshim negizinde óńirler arasyndaǵy «Sıfrlyq» teńsizdikti tómendetýge, oqýshylardyń rúkzaktaryn jeńildetýge maqsat qoıyldy», - dedi Baǵdat Mýsın.
Sonymen qatar Mýsınniń aıtýynsha, oqý-aǵartý mınıstrligimen birlesip 2023 jyldyń sońyna deıin mektepterge arnalǵan lokaldy jáne Wi-Fi jelilerdiń standartty talaptaryn, jumys tártibi men topologıalaryn bekitý usynylady.
«Sonymen birge, mınıstrlik mektepter úshin baılanys operatorlarynyń biryńǵaı baılanys ortalyǵyn qurýdy qolǵa alatyn bolady. Al ákimdikter 2023 jyldyń sońyna deıin ár mektep ishinden lokaldy jeliniń bolýyn qamtamasyz etýi qajet», - dedi Sıfrlyq damý mınıstri.