Mundaı balalarǵa beriletin turǵyn úı sany 38 paıyzǵa ósti.
2022 jyldyń 9 aıynda jetim jáne ata-anasynyń qamqorlyǵynsyz qalǵan 534 balalar turǵyn úımen qamtamasyz etildi, dep habarlaıdy Almaty-akshamy.kz QazAqparatqa silteme jasap. Bul jaıynda Senat depýtatynyń saýalyna QR Premer-Mınıstri Álıhan Smaıylovtyń jaýabynda aıtylǵan, dep habarlaıdy QazAqparat tilshisi.
«Jetim balalar men ata-anasynyń qamqorlyǵynsyz qalǵan balalardyń komýnaldyq turǵyn úı qorynan nemese jeke turǵyn úı qorynan jergilikti atqarýshy organ jaldaǵan turǵyn úıden úı alýǵa birinshi kezektegi quqyǵy bar. Zańǵa sáıkes, jetim balalar men ata-anasynyń qamqorlyǵynsyz qalǵan balalarǵa komýnaldyq turǵyn úı qorynan nemese jeke turǵyn úı qorynan jergilikti atqarýshy organ jaldaǵan turǵyn úılerdiń jalpy sanynyń keminde jıyrma paıyzy bólinedi. Jetim balalar men ata-anasynyń qamqorlyǵynsyz qalǵan balalarǵa jylyna beriletin turǵyn úı sany 38 paıyzǵa ósti. Osy jyldyń 9 aıynda memlekettik turǵyn úı qorynan 5 165 azamat, onyń ishinde jetim jáne ata-anasynyń qamqorlyǵynsyz qalǵan 534 balalar turǵyn úımen qamtamasyz etildi», - delingen Senat depýtatynyń saýalyna QR Premer-Mınıstri Álıhan Smaıylovtyń bergen jaýabynda.
Onyń dereginshe, jetim balalar men ata-anasynyń qamqorlyǵynsyz qalǵan balalardy turǵyn úımen qamtamasyz etý maqsatynda barlyq óńirlerde osy sanattaǵy balalardy qoldaý jónindegi keshendi josparlar ázirlendi.
«Onda jetim balalar men ata-anasynyń qamqorlyǵynsyz qalǵan balalardy búdjetten tys, demeýshilik qarajat esebinen, sondaı-aq patronattyq uıymdardyń qarajaty esebinen turǵyn úımen qamtamasyz etý jónindegi sharalar kózdelgen. Budan basqa, jetim balalar men ata-anasynyń qamqorlyǵynsyz qalǵan balalarǵa arnalǵan bilim berý uıymdarynyń tárbıelenýshilerine «Otbasy bank» AQ-da depozıttik shottar ashyldy, olar asyraýshysynan aırylý, múgedektik, alıment boıynsha alatyn járdemaqylary esebinen, sondaı-aq áleýmettik áriptesterdiń, bıznes-qurylymdardyń qarajat aýdarýy jolymen tolyqtyrylady», - dedi Úkimet basshysy.