Deıturǵanmen, búginde aýyl jurtshylyǵy qalada turýǵa asyq.
«Búginde Qazaqstan halqynyń 40 paıyzǵa jýyǵy aýylda turady. «Aýyl – el besigi» dep halqymyz beker aıtqan joq. Aýyldaǵy jaǵdaıdy jaqsarta almasaq – bárimizge syn. Sol úshin men aýyldy damytý máselesi týraly Jarlyqqa qol qoıamyn. Osy qujat arqyly Úkimetke aýyldy damytýdyń bes jylǵa arnalǵan naqty josparyn ázirleýdi tapsyramyn. Úkimet aýyldy damytýǵa arnalǵan barlyq jobany júıeli túrde rettep, jınaqtaýy tıis. Sodan keıin maqsatty túrde tıimdi jumys júrgizemiz».
Bul - Memleket basshysy Qasym-Jomart Toqaevtyń 2022 jylǵy 26 qarashada Ulyqtaý saltanatynan keıin sóılegen sózinen. Onda Prezıdent óziniń jańa prezıdenttik merzimdegi birinshi Jarlyǵyn aýylǵa arnap, dál sol kúni «Qazaqstannyń aýyldyq aýmaqtaryn damytýdyń 2023-2027 jyldarǵa arnalǵan tujyrymdamasy týraly» Jarlyqqa qol qoıǵan bolatyn.
Memleket basshysy aýyldy gúldentý máselelerine prezıdenttik alǵashqy merziminen beri erekshe nazar aýdaryp keledi.
Degenmen, aýyl halqy qalaǵa qaraı kóshýge beıim. Qazirgi ýaqytta elimizdiń aýyldarynda 7,5 mıllıonnan astam adam turady.
Ulttyq statısıka búrosynyń málimetinshe, bul – el halqynyń 38,2%-y.
Ýrbanızasıa qarqynyna baılanysty sońǵy jyldary aýyl halqynyń úlesi azaıyp keledi. Eger 2022 jyldyń basynda aýyldardaǵy halyq sany 7 728 176 adamdy qurasa, 2023 jyldyń basynda bul kórsetkish 7 556 745 boldy. Onyń ishinde 3 832 903 – erler, 3 723 842-áıelder.
Aýyl turǵyndarynyń sany jaǵynan Túrkistan oblysy alda, ondaǵy aýyldyqtar sany – 1 599 909 adam. Ekinshi orynda Almaty oblysy – 1 262 161 adam, úshinshi orynda Jambyl oblysy – 691 179 adam. Odan keıin Qyzylorda oblysy – 442 423 jáne Mańǵystaý oblysy – 420 052. Aýyl turǵyndarynyń sany Ulytaý oblysynda eń az, onda oblys halqynyń 21%, ıaǵnı 46 328 adam turady.
Oblys halqynyń jalpy úlesinde aýyldyqtar sany basym 7 óńir: Almaty, Jambyl, Qyzylorda, Mańǵystaý, Soltústik Qazaqstan, Túrkistan jáne Jetisý oblystary.