Marafonnyń maqsaty – otandyq aýyl sharýashylyǵy ónimderiniń básekege qabilettiligin arttyrý, halyq qolóneriniń elementterin saqtaý jáne kórsetý, aýyldardy turaqty damytý.
Qazaqstan Respýblıkasy Táýelsizdiginiń 30 jyldyǵyn merekeleý aıasynda aýyldyq jerlerde turatyn azamattardyń ómir súrý sapasy men ál-aýqatyn jaqsartý maqsatynda 1 qazannan bastap «Aýyldyń gúldenýi-Qazaqstannyń gúldenýi» marafony bastaldy, dep habarlaıdy Almaty-akshamy.kz QR Aýyl sharýashylyǵy mınıstrliginiń baspasóz qyzmetine silteme jasap.
İs-shara aıasynda otandyq óndirýshilerdiń aýyl sharýashylyǵy salasyndaǵy jetistikteri men ónimderiniń kórme-jármeńkelerin uıymdastyrý, derekti fılmder túsirý, aýyl eńbekkerleriniń, eńbek erleriniń, ǵalymdardyń, aýyl jáne aýdandardyń qurmetti azamattarynyń qatysýymen aýyl ómiri týraly maqalalar jarıalaý josparlanýda. Jergilikti atqarýshy organdar tarapynan uıymdastyrylatyn is-sharalar negizinen aýyl sharýashylyǵy taýarlaryn ishki jáne syrtqy naryqtarǵa shyǵarýǵa, azamattardy aýyl sharýashylyǵy salasynda qol jetkizilgen jetistiktermen tanystyrýǵa, qazaqstandyq memlekettilikti saqtaýǵa jáne nyǵaıtýǵa, Qazaqstan azamattarynyń birlik jáne patrıotızm sezimderin kúsheıtýge baǵyttalatyn bolady.
«İs-sharalar epıdemıologıalyq jaǵdaıdy eskere otyryp, 2021 jylǵy 1-31 qazan aralyǵynda qalalarda, aýdandar men aýyldarda ótkiziletin bolady», - delingen mınıstrliktiń habarlamasynda.