Qazaq halqynyń rýhanı tiregi, ulttyq úni – Qazaq radıosy. Ulttyń únjarıasyna aınalǵan «Qazaq radıosyna» bıyl 100 jyl, «Shalqar» radıosyna 55 jyl tolyp otyr. Radıo 1921 jyly 1 qazanda alǵash ret habar taratty.
Osyǵan oraı, Memleket basshysy Q.Toqaev «1 qazan – Radıo qyzmetkerleri kúni» dep jarıalaýdy usynǵan bolatyn, dep habarlaıdy Almaty-akshamy.kz.
Prezıdent usynysymen 13 tamyzda QR Úkimetiniń qaýlysy shyqty.
Atap aıtqanda, merekeler tizimine «34-2. Radıo kúni – 1 qazan» tarmaǵy engizildi. Qaýly keshe kúshine endi.
Ǵasyrlyq merekege oraı «Qazaq radıosynyń» Almaty qalasyndaǵy ǵımaratynyń qabyrǵasyna «Radıo úıi» degen jazýy bar memorıaldyq taqta ornatyldy.
Onyń ashylý saltanatyna radıoda uzaq jyl qyzmet etken ardager jýrnalıser, radıo jýrnalıseri men BAQ ókilderi qatysty. İs-shara barysynda ardager jýrnalıser radıonyń tarıhyna toqtalyp, ózderiniń estelikterin aıtty.
«Qazaq radıosynyń» ǵasyrlyq mereıtoıyna oraı Jeltoqsan kóshesindegi aıaldamaǵa radıonyń aty berilip, radıo apparaty ilinip qoıyldy. Onda endi táýlik boıy radıo sóılep turatyn bolady. Bolashaqta Almatynyń árbir aıaldamasynda Qazaq radıosy sóılep tursa, nur ústine nur bolar edi. Búgingi aıaldamada Qazaq radıosynyń sóıleýi Orynborda 1921 jyly ashylǵan alǵashqy radıo sekildi ystyq», - dedi «Qazaq» jáne «Shalqar» radıolarynyń Almaty stýdıasynyń jetekshisi Baqyt JAǴYPARULY.
Namazaly OMASHEV, Qazaqstannyń eńbek sińirgen qaıratkeri, fılologıa ǵylymynyń doktory ulttyń ún jarıasyna qatysty pikirin bildirdi.
«Bul kún erekshe este qalatyn, qazaq halqy men mádenıeti úshin abyroıly kún. Qazaq radıosynyń ǵasyrlyq tarıhyn az ýaqyttyń ishinde aıtyp taýysý múmkin emes. Qazaq radıosynan beriletin «Ardagerlerdiń estelikteri» baǵdarlamasyn shamam kelgenshe úzbeı tyńdaımyn. Árqaısysynyń aıtary bar. Radıo tyńdaǵanda basymdy ızep, rahattanyp otyramyn. Qazaq radıosy dúrildep turǵan kezinde qyryq «Pravda» gazetine júk bolatyn materıal bergen kezi boldy. Zamanǵa qaraı qazirdiń ózinde radıoda saǵattap tikeleı efırge shyǵady. Kezinde saqa jýrnalıserdiń ózi «tikeleı efırge bar» degende tizesi dirildeıtin. Radıodan basqa eshbir sala bul júkti atqara almas edi. Sebebi, ol kezde televızıa atymen joq, baspasóz az boldy. Jańalyqtardy bútin bir respýblıkaǵa tez jetkizý múmkin emes. Alǵashqy radıohabarlardyń negizin qalaǵan – Alash arystary. Onyń ishinde – Ahmet Baıtursynuly. Ol týraly kezinde «Ahańdar ashqan arna» dep maqala jazdym», - dedi ol.
Sonymen qatar, Radıo úıiniń janyndaǵy avtobýs aıaldamasyna «Qazaq radıosy» aıaldamasy degen ataý berilip, qalanyń kartasyna engizildi.
Osy aıaldama janynda 24 saǵat boıy Qazaq radıosy tolqyny habar taratyp turady. Merekelik is-shara aıasynda QR Ulttyq kitaphanasynda «Almatydan sóılep turmyz...» atty radıonyń ǵasyrlyq tarıhynan syr shertetin kóne qujattar men sýret kórmesi ótkizilip, sońy konserttik baǵdarlamaǵa ulasty.
Qymbat ÁBİLDÁQYZY, QR mádenıet qaıratkeri, Qazaq teleradıosynyń ardageri aqjarma tilegin aıtty.
«Búgin júrekjardy qýanyshty kún. Qazaq radıosy – ulttyń úni, qazaqtyń tili men bolmysy. Radıodan bizdiń beınemiz kórinbese de, júregimiz kórinetin. Sol júregimizben qazaq radıosynyń ǵasyrlyq toıyna aman-esen jetip, jarqyn isterine kýá bolyp turmyz. Bul biz sekildi ardagerlerdiń ortaq úıi. Radıo arqyly armanymyzdy aıtyp, eldiń armanyn jetkizip, joǵyn túgendedik. Únińnen, qunyńnan aınalaıyn, Qazaq radıosy!», - dedi ol.
Saýyq JAQANOVA, QR eńbek sińirgen artısi, radıoda istegen kezderi týraly oıymen bólisti.
«Ǵasyr jasaǵan Qazaq radıosynda 55 jyl qyzmet atqardym. Radıo tek osynda jumys istegen jýrnalıserdiń ǵana emes, búkil qazaqtyń radıosy, únjarıasy. Halyqtyń mádenıeti men ádebıetin nasıhattaıtyn kıeli oryn. Búgin radıo salasynda ózimmen qatar qyzmet istegen jýrnalıserdi kórip, kózaıym bolyp jatyrmyz», - dedi ol.