Elimizde sońǵy 1,5 jyl ishinde 968 aýyldyq eldi mekende baılanys sapasyna tekserý júrgizildi. Atalǵan aýyldar barlyq mobıldi operator jelisine qosylý boıynsha «250+» baǵdarlamasyna kiredi. Bul týraly QR Sıfrlyq damý, ınovasıalar jáne aeroǵarysh ónerkásibi mınıstrligi telekomýnıkasıalar komıtetiniń tóraǵasy Erjan Meıramov málim etti, dep habarlaıdy Almaty-akshamy.kz QazAqparat-qa silteme jasap.
Telekomýnıkasıalar komıteti basshysynyń málimetinshe, 3G jelisi úshin eń tómengi sapa parametri sekýndyna 1 megabıt, 4G úshin iri qoldanýshyǵa sekýndyna 5 megabıt qajet. Tekserýdiń qorytyndysy boıynsha aýyldardyń tek 56-60 paıyzynda ǵana baılanys atalǵan talaptarǵa sáıkes keletini anyqtaldy.
«Baılanys bazalary ornatylǵan kezde qoldanýshylar tutynatyn aqparat kólemi úshin sapa jetkilikti boldy. Jyl saıyn baılanysty tutyný kólemi men trafık artyp keledi. Ol sátte basqa qoldanýshy úshin baılanys sapasy tómendeıdi. Bul mınıstrliktiń nemese operatordyń sapasyz jumys isteýinen emes. Ýaqyt ózgeredi, sáıkesinshe tutyný kólemi artady. Baılanys sapasyn basqa jabdyqtar esebinen jaqsartý nemese bazalyq stansalardyń tyǵyzdyǵyn qamtamasyz etý qajet», - dep tolyqtyrdy vıse-mınıstr.
Buǵan deıin QR Sıfrlyq damý, ınovasıalar jáne aeroǵarysh ónerkásibi mınıstri Baǵdat Mýsın jaryq baǵanalaryna baılanyspen qamtıtyn bazalyq stansalardy da ornatý ıdeıasyn usynǵan bolatyn. Odan bólek, vedomstvo basshysy turǵyndardyń radıofobıasy baılanys sapasyn arttyrýǵa kedergi keltirip otyrǵanyn tilge tıek etti.