Qazaqstan Respýblıkasynyń Prezıdenttigine kandıdat Jıgýlı Daırabaev úgit-nasıhat jumystaryn Batys Qazaqstan oblysynda jalǵastyrýda. Óńirge arnaıy kelgen kandıdat Jáńgir han atyndaǵy Batys Qazaqstan agrarlyq-tehnıkalyq ýnıversıtetinde kezdesý ótkizdi. Jıynǵa ýnıversettiń basshylary men oqytýshýylyq quramy, stýdentter, JOO belsendileri qatysty. Kezdesý barysynda oqý ordasynda bilim alǵan mamandardyń jumyspen qamtamasyz etilýi talqyǵa salyndy.
«Iá, rasynda aýyldyq jerler men qalanyń damý deńgeıinde aıyrmashylyq bary jasyryn emes. Osyny anyq ańǵaryp, kórip júrgen jastar oqý bitirgen boıda aldymen qalada qyzmetin bastap, sol jerde turaqtap qalýdy kózdeıdi. Biraq ózimiz aıtqandaı, aýyldardy damytý memlekettiń basty baǵyttarynyń birine aınalyp otyr. Osy rette «Dıplommen – aýylǵa!» baǵdarlamasyna ózgerister engizý qajet dep sanaımyn», – dep atap ótti Jıgýlı Daırabaev.
Kandıdat aýyldan shyqqan jastar qaıta aýylǵa oralyp, óz týǵan jeriniń damýyna úles qosýy qajet deıdi. Ol úshin olarǵa barlyq jaǵdaı jasalýy tıis. Aýyldyq eldi mekenderdegi bilikti maman tapshylyǵynyń ornyn toltyrýdyń birden-bir joly osy. «Dıplommen – aýylǵa!» baǵdarlamasynyń aıasyn keńeıtip, jumysty jańa deńgeıde jalǵastyrǵan jón.
«Elimizdegi aýyl sharýashylyǵy baǵytyndaǵy ýnıversıtetterdiń túlekteri nege mamandyq boıynsha jumys isteýge barmaıdy? Birinshiden, saladaǵy jalaqynyń tómendigine baılanysty. Ekinshiden, aýyldaǵy turmystyq jaǵdaıdyń qıyndyǵy, kóptegen aýyldarda qarapaıym sýyq sý, ınternet joq, joldar óte nashar. Úshinshiden, balalarǵa arnalǵan damytý ortalyqtarynyń joqtyǵy. Sondyqtan «Aýyl» partıasy usynyp otyrǵandaı, aýyl jáne aýyl sharýashylyǵy máselelerin birlesip sheshý qajet», – degen pikirde Jıgýlı Daırabaev.
Qandıdat Jıgýlı Daırabaev «Jaıyq Et» kásipornyna baryp, eńbek ujymymen kezdesti. Búginde zamanaýı et óńdeý kesheni 8 myń tonna ónim shyǵarady. Kásiporyn óndiris kólemin arttyrýǵa nıetti. Alaıda zaýyt basshylyǵynyń aıtýynsha, nesıe alý boıynsha qıyndyqtar týyndap otyr.
Osy rette Jıgýlı Daırabaev agrobıznes qurǵysy jáne agrarlyq salany nyǵaıtqysy keletinder úshin paıyzsyz nesıe beretin arnaıy agrobank qurýdy usynǵanyn atap ótti.
«Paıyzsyz nesıe qojalyqtar men fermerlik sharýashylyqtarǵa, jeke kásipkerlerge, aýyl sharýashylyǵy óndiristik kooperatıvterin ashý men jeke bıznesti keńeıtýge berilýi tıis. Men bul ózekti máselege ózimniń saılaýaldy baǵdarlamamda da toqtaldym. Biz aýyl sharýashylyǵy salasyn damytýǵa nıetti bolsaq, osy baǵytta eńbek etip júrgen azamattarymyzdy qoldaýymyz kerek», – dedi Jıgýlı Daırabaev.