Úsh jyl ishinde 655 densaýlyq saqtaý obektisin salý jáne 32 aýdanaralyq aýrýhanany jańǵyrtý josparlanǵan.
Bul týraly Májiliste «2024 – 2026 jyldarǵa arnalǵan respýblıkalyq búdjet týraly» zań jobasyn tanystyrý kezinde Qarjy vıse-mınıstri Abzal Beısenbekuly aıtty, dep habarlaıdy Almaty-akshamy.kz QazAqparatqa silteme jasap.
«Bıyl «Aýylda densaýlyq saqtaýdy jańǵyrtý» Ulttyq jobasyn iske asyrý bastaldy. Bekitilgen ulttyq jobaǵa sáıkes, 2023-2025 jyldary 655 densaýlyq saqtaý obektisin salý jáne 32 aýdanaralyq aýrýhanany jańǵyrtý josparlanǵan. Bul 4 mln-nan astam aýyl turǵyndaryn mamandandyrylǵan medısınalyq kómekpen qamtýǵa múmkindik beredi. Jobany iske asyrýǵa 2024 jylǵa arnalǵan búdjet jobasynda qujattamanyń ázirligin eskere otyryp, 35,1 mlrd teńge qarastyrylǵan», - dedi A. Beısenbekuly.
Onyń aıtýynsha, halyq sanynyń ulǵaıýyn eskere otyryp, tegin medısınalyq kómektiń kepildendirilgen kólemi jáne mindetti áleýmettik medısınalyq saqtandyrý júıesi aıasynda shyǵystar 2,2 trln teńgeni qurady.
Budan bólek vıse-mınıstr 2024 jyly respýblıkalyq búdjettiń sport, týrızm jáne mádenıet salalaryn damytýǵa arnalǵan shyǵystary 298 mlrd teńge kóleminde josparlanǵanyn aıtty. Onyń ishinde joǵary jetistikterge negizdelgen sportty damytýǵa, mádenıet jáne arhıv isi uıymdarynyń jumystaryn qamtamasyz etýge, mádenıet, óner ári sport salalarynda daryndy balalardy oqytýǵa jáne tárbıeleýge, týrızm men týrısik qyzmetti damytýǵa, sondaı-aq Dúnıejúzilik Kóshpendiler oıyndaryn ótkizýge baǵyttalǵan.