El aýmaǵynda qatynap júrgen 654 vagonnyń (32%) qoldaný merzimi 20 jyl jáne odan joǵary.
Bul týraly «Jolaýshylar tasymaly» AQ bas dırektory Jánibek Taıjanov málim etti, dep habarlaıdy Almaty-akshamy.kz QazAqparatqa silteme jasap.
«Búginde bizde qoldanysta 2098 vagon bar. Bizdiń eski vagondarǵa jıi-jıi syn aıtylady, biz ony qabyldaımyz. Qatynap júrgen 654 vagonnyń (32%) qoldaný merzimi 20 jyl jáne odan joǵary. Bul - eski vagondar. Ótken jyly 256 eski vagondy isten shyǵardyq. Sońǵy 10 jylda «Jolaýshylar tasymaly» AQ parki 50%-ǵa jańartyldy. Qaýipsizdik, jaılylyq jáne ekologıa talaptaryna sáıkes zamanaýı halyqaralyq talaptarǵa jaýap beretin 1200-den astam vagon satyp alyndy», - dedi Jánibek Taıjanov.
Sondaı-aq, spıker Úkimettiń qoldaýymen jyl saıyn poıyz vagondary jańartylyp jatqanyn aıtty.
«Qazir 654 eski vagon bar. Olar ár baǵytta qatynaıdy. Qalǵan vagondar boıynsha 52% - bul shamamen 1100 vagon 11 jylǵa deıin qoldanylyp kele jatyr. Qalǵan bóliginiń paıdalanylǵan merzimi - 11-20 aralyǵynda», - deıdi ol.
Onyń aıtýynsha, isten shyqqan vagondardyń paıdalaný merzimi 40 jyl jáne odan da kóp bolǵan.