Qazaqstannyń bas dárigeri aýyl turǵyndarynda jıi kezdesetin aýrýlardy atady
Qazaqstannyń Densaýlyq saqtaý mınıstri Ajar Ǵınıat aýyldyq eldi mekenderdegi densaýlyq saqtaý kórsetkishteri týraly baıandady, dep habarlaıdy Almaty-akshamy.kz QazAqparatqa silteme jasap.
«Búginde aýylda shamamen 8 mln adam turady, bul el halqynyń 41%-yn quraıdy. Aýyl turǵyndaryna 5 myńnan astam medısınalyq uıym medısınalyq kómek kórsetedi. Jalpy medısınalyq-demografıalyq jaǵdaı elimizde turaqty. Resmı statısıka boıynsha, halyqtyń densaýlyǵy jaqsaryp, ólim-jitim sońǵy 9 aıda 28,5%-ǵa tómendedi», - dedi mınıstr Úkimettiń búgingi otyrysynda.
Onyń aıtýynsha, aýyl halqynyń densaýlyǵyn taldaý olardyń birinshi (42,7%) tynys alý aǵzalarynyń aýrýlarynan zardap shegetinin kórsetedi, ekinshi orynda as qorytý, úshinshi orynda – nesep-jynys júıesi aýrýlary oryn alǵan.
«Shalǵaı aýyl turǵyndaryna medısınalyq qyzmetterdiń qoljetimdiligin qamtamasyz etý maqsatynda kólik medısınasy damyǵan. Medısınalyq kómek jáne konsýltasıalyq-dıagnostıkalyq qyzmetter kórsetetin 149 jyljymaly medısınalyq keshen jumys isteıdi. Bıyl elimizdiń 10 óńirinde 64 myń turǵynǵa medısınalyq kómek kórsetken «Járdem» jáne «Salamatty Qazaqstan» medısınalyq poıyzdary qaıtadan iske qosyldy», - dedi Ajar Ǵınıat.
Sonymen birge, medısınalyq avıasıany aýyl turǵyndaryn tasymaldaıtyn jáne shuǵyl kómek kórsetetin 33 áýe kemesi júrgizedi. Aýylda jedel medısınalyq kómek kórsetý úshin 595 brıgada jumys isteıdi jáne 2 mln shaqyrtýǵa qyzmet kórsetilgen.