Aýyl mektepteriniń oqýshylary arasynda jaratylystaný-matematıkalyq baǵyt boıynsha ótken II Respýblıkalyq olımpıadanyń qorytyndysy shyǵaryldy.
Qorytyndy kezeńge 486 oqýshy qatysyp, onyń ishinde 221 oqýshy jeńimpaz atandy. Bul balalar – elimizdiń eń shalǵaı aımaqtarynan kelgen daryndy jastar, dep habarlaıdy aqshamnews.kz Oqý-aǵartý mınıstrligine silteme jasap.
Marapattaý rásimine Orta bilim berý komıtetiniń tóraǵasy Qanybek Jumashuly Bekbolatov qatysty.
«Oqý-aǵartý mınıstrligi aýyl mektepteriniń talantty jáne bilimge qushtar oqýshylaryn anyqtaý maqsatynda respýblıkalyq olımpıada ekinshi jyl qatarynan ótkizýde. Eger byltyr olımpıadanyń birinshi kezeńine 78 myń oqýshy qatyssa, bıyl olardyń sany 113 myńnan asty. Bul aýyl oqýshylarynyń zıatkerlik jarystarǵa degen qyzyǵýshylyǵynyń artyp, respýblıkalyq olımpıadanyń mártebesiniń joǵary ekenin kórsetedi. Barshańyzdy jetistikterińizben quttyqtaımyn jáne bilim jolynda jańa tabystar tileımin!» – dedi komıtet tóraǵasy.
«Olımpıadanyń eń jas qatysýshysy» nomınasıasy boıynsha dıplomdarmen Pavlodar oblysynan Imran Qusaıynov jáne Qyzylorda oblysynan Tóre Baltabaev marapattaldy.
«Men 6-synypta oqımyn, biraq olımpıadaǵa 9-synyp baǵdarlamasy boıynsha qatysamyn. Bizdiń elde bilim alyp, ǵylymmen aınalysýǵa kóptegen múmkindikter bar ekenin maqtan tutamyn. Memleketimiz talantty balalardy qoldaýǵa erekshe kóńil bóledi. Biz úshin olımpıadalar, baıqaýlar uıymdastyrylady, al úzdikter halyqaralyq jarystarǵa jiberiledi. Men de olımpıadalyq rezervtiń bir bóligi bolýdy, bilimimdi jetildirip, bir kúni elim úshin altyn medal utyp alýdy armandaımyn!» – dep bólisti Tóre Baltabaev.
Olımpıadada barlyǵy 221 medal sarapqa salyndy: 117 qola, 62 kúmis jáne 42 altyn medal.
Aýyl mektepteriniń oqýshylaryna arnalǵan respýblıkalyq olımpıada 13 pán boıynsha jaratylystaný-matematıkalyq jáne qoǵamdyq-gýmanıtarlyq baǵyttarda úsh kezeńde ótedi. Mektep kezeńine 99 264 oqýshy qatysyp, olardyń 53 593-i aýdandyq kezeńge ótti. Oblystyq kezeńde 12 000 oqýshy baq synady, al fınalǵa 1000-ǵa jýyq oqýshy shyqty. Sonyń ishinde 486 oqýshy jaratylystaný-matematıkalyq baǵyttaǵy olımpıadaǵa qatysty, al 450 oqýshy qoǵamdyq-gýmanıtarlyq baǵyt boıynsha olımpıadaǵa qatysady. Bul olımpıada 10-14 jeltoqsan aralyǵynda Astana qalasynda ótedi.
«Úzdik olımpıadalyq komanda» nomınasıasy boıynsha I dárejeli dıplomdar Qyzylorda, Túrkistan jáne Mańǵystaý oblystarynyń qurama komandalaryna tabystaldy.
Jeńimpazdarǵa elimizdiń jetekshi joǵary oqý oryndarynyń 8 rektorlyq granty tabystaldy: 6 grant – SDU-dan, 2 grant – Halyqaralyq Qoja Ahmet Iasaýı ýnıversıtetinen. Sondaı-aq, matematıka, fızıka jáne ınformatıka pánderi boıynsha I dárejeli dıplom ıegerleri – 9-10 synyp oqýshylaryna Almaty qalasyndaǵy Respýblıkalyq fızıka-matematıka mektebinde 2025-2026 oqý jylynda bilim alýǵa grant berildi.
Aıta keteıik, olımpıadanyń qorytyndy kezeńine qatysqan barlyq oqýshylar «Daryn» respýblıkalyq syrttaı mektebine qabyldanady. Sonymen qatar, I dárejeli dıplom ıegerleri 2025 jylǵy naýryz aıynda ótetin jalpy bilim beretin pánder boıynsha respýblıkalyq olımpıadanyń sońǵy kezeńine qatysady.