Qazaqstannyń tanymal estrada ánshisi, telejúrgizýshi Tamara Asar Almatyda ótken «Han Sultan. Altyn Orda» operasynyń premerasynan erekshe áser alǵanyn jetkizdi.
– Eń aldymen, qoıylymǵa qatysqan barlyq shyǵarmashylyq topqa úlken qurmet. Menińshe, Han Sultan beınesi – jaýynger ári ana retinde óte jaqsy ashylǵan. Qoıylymnyń basynan sońyna deıin kóz jasymdy tıa almadym, óıtkeni árbirimizdiń boıymyzda analyq meıirim, jaýyngerlik rýh jáne áıelge tán náziktik bar. Biz osy qasıetterdiń barlyǵyn bir áıeldiń boıynan kórdik. Sonymen qatar, Han Sultan elge, jubaıyna, balalaryna adaldyqtyń keremet úlgisin kórsetti, – dep bólisti Tamara Asar.
Ánshiniń aıtýynsha, bul opera Qazaqstan úshin úlken mańyzǵa ıe.
– Sondyqtan ony árbir azamat kórýi kerek dep oılaımyn. Qoıylymdy sahnalaýshylarǵa, ıdeıa avtorlaryna, jazýshylarǵa, ártisterge, opera ánshileri men mýzykanttarǵa sheksiz alǵys. Bul jerde tek tarıh qana emes, adaldyq, psıhologıa jáne adamgershilik týraly tereń maǵyna bar. Sonymen qatar, shynaıy arnaıy effektiler erekshe áser qaldyrdy, bári sonshalyqty nanymdy ári tiri kórindi, kórermender sol dáýirdiń oqıǵalaryna tolyqtaı endi, – dedi ánshi.